Алдағы демалыс күндері ауа райы қандай болады?
Синоптиктер 2019 жылдың 7-9 желтоқсан аралығында ауа райы қандай болатынын айтты, - деп хабарлайды Tengrinews.kz тілшісі "Қазгидромет" РМК өкілдеріне сілтеме жасап."Алдағы күндері солтүстік, орталық және шығыс облыстарда Қазақстан территориясы арқылы жылжитын суық атмосфералық фронттармен жауын-шашын, тұман және көктайғақ күтіледі. Фронттардың орнына антициклон келіп, республиканың оңтүстік, содан кейін орталық, шығыс және солтүстік облыстарында жауын-шашынның тоқтауы күтіледі, бірақ тұман мен көктайғақ сақталады", - делінген хабарламада. Биіктегі ауа массаларының ағымы батыс бағытынан болғандықтан, ауа температурасы біраз төмендесе де, орташа көпжылдық мәннен жоғары болып қалады.
