Әрбір мәселе назардан тыс қалмайды
Бұл – аймақ басшысының ұстанымы. Жыл басталғалы аудандарға, елді мекендерге шығып, халықпен етене кездескен Қызылорда облысының әкімі Қуанышбек Ысқақовтың жұмыс сапары ең алдымен Арал, Қазалы аудандарынан басталып, Жалағаш ауданында жалғасты. Мұндағы мақсат – шалғай орналасқан елді мекендердің жағдайын көзбен көріп, ауыл тұрғындарының тіршілігімен танысу. Елмен кездесу кезінде әрбір тұрғынның тілегін мұқият тыңдаған аймақ басшысы қайсыбыр сауалға болмасын нақты жауап та берді. Мәселен, облыс әкімінің Жалағаш ауданы Мырзабай ахун ауылдық округіндегі кездесуде тұрғындар дәрігерлік амбулатория керек екендігін айтты. Бұл мәселе мемлекеттік-жекешелік әріптестік аясында шешілетіндігін жеткізді өңір басшысы. Сонымен қатар Таң ауылында да жаңа емхана мемлекеттік-жекешелік әріптестік аясында салынбақ. Ауданға қарасты 14 елді мекеннің жағдайымен танысқан облыс әкімі Қуанышбек Ысқақов тұрғындар көтерген мәселенің ешқайсысы назардан тыс қалмайтындығын айтты.
