Ақмешіт апталығы

Алпауыт елдерді алқымдаған дерт ат төбеліндей ұлтымыздың әбігерін шығарып, әуреге түсіргеніне де айдан асып барады. Бұрын мұндай қауіп ошағына айналмаған елді біршама үрей жайлағаны анық. Кең сахара даланы алып жатқан қонақжай, жайдары қазақтың шекара шегендеуі ерсі көрінгенмен, мұндағы түрлі ұлтты бауырына басқан ел қауіпсіздігі үшін темірдей тәртіп қажет. Әрине, төтенше жағдай тәртібіне еркін өскен жылқы мінезді қазекемнің көнбеске амалы қалмады. Өйткені, сан елді сан соқтырған дерт дендеп барады. Ажалдың тырнағына ілінбеу үшін соғыс жағдайындағыдай жауапкершілік керек. Бұрын ата-бабаларымыз көзге көрінетін жаумен айқасса, көзге көрінбейтін тажалмен арпалысу сынағы біздің ұрпақтың маңдайына жазылыпты. Алматы мен Нұр-Сұлтандай ірі мегаполисте етек алған аты жаман вирус Сыр елінің бұл күндері мазасын қашыра бастады. Сырбаз Сыр халқы қазір желімдей жабысса отбасы-орманыңмен зақымдайтын жұқпалы науқаспен 24 сағат бойы арпалыс үстінде. Бұл досың тұрмақ, қас дұшпаныңы да тілеуге аузың бармайтын есті алған есер дерт екені мәлім болды. Батпандап кірген аурудың мысқалдап шығатыны тағы бар. Кеселден сақтану жолдарын күні-түні көк жәшікке телмірген біздің жерлестеріміз жаттап алған болар. Мұны сала мамандары айтып та жатыр. Дөңгеленген дүниенің бұл да болса адамзат басына түскен уақытша сынағы болар. Осындайда шамадан тыс самарқаулығымыз бен бейғамдығымыздан таяқ жеп қаламыз. Басқа түскен нәубетті бір кісідей көтерген нардай ұлттың ұрпағы едік. Ендеше, не тұрыс? Жүгенсіздікке бой алдырмай, бір сәт оң-солымызға қарасақ нетті?Бірегей тәртіпті белден басып жүрген самарқаулығымыз сан соқтырып отырғаны қатты ойландырады. Дүбірімен дүниені дүр сілкіндіріп, шартарапты жайлаған індет сіздің есігіңізден күліп кіріп, күңірентіп жіберсе не істейсіз?Әлі топтасып той жасау, алаңға бала жіберіп алаңсыз ойнату, почта мен банк алдына ұзын-сонар кезекке тұру тыйылар емес.

Сала мамандарының айтуынша, бүгінде төтенше жағдай режимін бұзушылықтың 176 фактісі тіркелген. Оның ішінде кафе мен мейрамханада - 40, жеке үйлер – 22, дүкен – 41, қонақ үй – 5, компьютерлік –7, басқа да тәртіп бұзушылықтар – 61. Олардың 51-не әкімшілік айыппұл салынса, 58-не әкімшілік қамау шарасы қолданылған. Міне, цифрларды сөйлетсек, біздің әлі мәселеге мәнсіз, жауапсыз қарап жүргеніміз байқалады. Әлеуметтік желіде елге сыйлы, сөзі үлгілі зиялы қауым өкілдері мен сала мамандары өздерінің келелі пікірін бейнеқоңырау арқылы жеткізіп, жолдап жатса да құлақ аспаймыз.

Ақпарат құралдары да жарғақ құлағы жастыққа тимей, дендеген дертті науқастардың ортасында жүріп, тікелей хабар таратып жатқаны да осы кісілерді селт еткізбегені ме қалай? Тіркелген науқастардың 60-70 проценті – жастар болып шықты. Қатар-құрбылар көңіл көтерудің жолын іздеп, сауық кешін ұйымдастырған. Нәтижесінде олар ауруды бір-біріне жұқтырған. Облыстық тауарлар, қызметтердің сапасы мен қауіпсіздігін бақылау департаменті басшысының орынбасары, аймақтың бас санитар дәрігері Әлия Әбдіқайымованың айтуынша, осындай топтық жағдай көптеп тіркеліп жатқаны белгілі болды.

–Осының салдарынан бір ауылдан 25 сырқат шықты. Аурудың алдын алу мақсатында қауіпсіздік шараларын күшейтуге бағытталған жаңа қаулы жарияланды. Ол бойынша топтасып көшеде жүруге тыйым салынып отыр. Үй карантинін сақтаңыздар! Қонаққа бармаңыздар, қонақ шақырмаңыздар, – деді бас санитар.

Қауіп сейілгенше өлім-жітім жағдайына жиналуға шектеу қойылып жатырғанын да ескертті ол. Қазіргі кезде Қызылорда еліміз бойынша ауру саны жөнінен алдыңғы үш облыстың қатарында тұрғанын ескерсек, біздің әлі де сырқаттың сырын түсінбегеніміз сезіледі. «Сақтансаң сақтаймын» дейді дана халқымыз. Қалғып кетіп, қалтарыста тұрған науқастың қақпанына түспейік. Ойнақтап жүріп от басқандар өздеріңді ғана емес, үйдегі ата-ана бауырларыңа қиянат жасайтындарың естеріңде болсын. «Төртеу түгел болса, төбедегі келеді. Алтау ала болса, ауыздағы кетеді» дегендей, төрт көзіміз түгел, дендеген дертті дарытпай, келісіммен, ортақ тәртіппен мәмілеге келіп, жарқын болашақ үшін тәртіпке көнейік, ағайын!