Өңірде инфекция жұқтырған 5 жағдай анықталды
Өңірде қауіпті инфекция жұқтырғандар саны 124 жетті. Өңірлік коммуникациялар қызметінде өткен брифингте облыстық денсаулық сақтау басқармасының басшысы Ж.Абдусаметов жаңадан 5 жағдайдың тіркелгенін атап өтті. Олар Шиелі, Сырдария, Жаңақорған ауданының тұрғындары. Бастапқы екі ауданнан шыққан 4 науқас бұрын ауру жұқтырған науқаспен қарым-қатынаста болып, карантиндік бақылауға алынған. Ал, 1 науқас Жаңақорған ауданында жаңадан анықталған. Инфекция жұқтырғандар 2-61 жас аралығындағы 2 ер адам мен 3 әйел кісі. Қазіргі уақытта ондағы індет ошағы анықталып, тиісті шаралар жүргізілуде.
Соңғы мәліметке сүйенсек, қазіргі таңда инфекциялық ауруханада 122 науқас ем қабылдауда. Жағдайы бірқалыпты саналады. Провизорлық стационарда – 25, карантиндік бақылауда – 407 адам оқшауланған. Сондай-ақ 1-Б категориялы елден келген 19 азамат болса, оның 4-еуі стационарлық, қалғаны үй бақылауына алынған. Жалпы коронавирусты жұқтырған науқаспен қарым-қатынаста болғандар саны бүгінде 1504 адамды құрайды. Олардың 843 жақын, 661 потенциалды байланыс жасаған.
"Ақмешіт-ақпарат"
