Төтенше жағдай кезіндегі полиция департаментінің жұмыстары
Аймақта болып жатқан төтенше жағдайға байланысты Қызылорда облысы Бас мемлекеттік санитариялық дәрігерінің қаулысына сәйкес, облыста қауіпсіздік шараларын күшейту мақсатында тұрғындардың көшеге себепсіз жүруіне және көлік қозғалысына шектеулер қойылды. Бұл туралы Өңірлік коммуникациялар қызметінің ақпараттық алаңында Қызылорда облысы Полиция департаменті бастығының бірінші орынбасары Шамшидин Амитов мәлімдеді.«Төтенше жағдай режимі жарияланғаннан бастап облыс бойынша 527 факті анықталды. Оның ішінде, 149-ы көліктің қозғалысына тыйым салу, 84-і еш себепсіз тұрғын үйден тыс жерде жүру, 67-сі дүкен бойынша болса, 49 -ы кафе-мейрамхананың қаулы талаптарын орындамауы»,-деді Шамшидин Егенбердіұлы.
Сонымен қатар, компьютер клубтары, автокөлік жөндеу орындары, қонақ үйлер және т.б. орындар тексерілді. 236 әкімшілік іс сотта онлайн-режимінде қаралып, 112 тұлғаға айыппұл салынса, 124-і әкімшілік қамаққа алынып, 13-і ескертілді.
Мұнан өзге, облыс бойынша 35 блок бекеттер қойылды. Қазіргі таңда 356 қызметкер жұмыс істеуде. Оның ішінде, 206-сы полиция қызметкері, 100-і әскери қызметкер, 50-і медицина қызметкері. Сондай-ақ, облысқа кіру және шығу жолдарына 3 санитарлық пост қойылды.
«Қызылорда қаласының ішінде 4 жерде патрульдік полицияның 11 бақылау бекеттері азаматтардың және көлік құралдарының қозғалысына бақылау жасау үшін қойылды»,-деді Шамшидин Егенбердіұлы.
Айта кетейік, осындай жұмыстар барлық аудандарда атқарылуда.
