ЖАҢАҚОРҒАНДА ФОЛЬКЛОРЛЫҚ АНСАМБЛЬДЕРДІҢ ФЕСТИВАЛІ БАСТАЛДЫ
Жаңақорған аудандық мəдениет үйінде күйші Әлшекей Бектібайұлының шығармашылығына арналған «Күй абызы – Әлшекей» атты облыстық фольклорлық ансамбльдердің өнер фестивалі басталды.Сыр елі-жыр елі десек, бүгінде тарихымызда қаншама жыршы, күйші, термешілер насихаттауды қажет етеді. Олардың кейінгіге қалдырған мұраларын дәріптеп, ізімізден ерген жастарға жеткізу - біздің міндет.
Атағы асқақ Әлшекей күйші 1932 жылы 85 жасында дүниеден озған. Шығармашылығында 100-ге тарта күйі болғанымен, бізге оның барлығы жетпеген екен. «Тоқырау», «Нарсоққан», «Егес», «Терісқақпай», «Толқын», «Аққу кеткен» сынды күйлерінің ел арасында таралуына Ибаш Өткелбаев, Жаманқұл Нұрмановтың еңбегі зор.
Салтанатты шарада аудан әкімі Ғалым Əміреев құттықтау сөз алып, қатысушыларға сəттілік тіледі.
