1 мамыр мерекесін тойлау тәртібі
Ұлт бірлігі басты байлықтардың біріне жатады. Кеңпейіл, дархан көңіл халықтың ұлықты ұрпағы қашаннан өзге ұлттың баласын жатсынбай, бір шаңырақтың астына біріге білген. Сыр өңірінде де талай ұлыстың баласы сүттей ұйып, достық пен бірліктің үлгісін паш етіп келеді. Облыс бойынша 11 этно-мәдени бірлестік ажырамай, мерейлі мейрамдарды бірге қарсы алып жатқан жайы бар.
Биыл да тәуелсіз еліміздегі маңызды мерекенің бірі саналатын 1-мамыр Қазақстан халқының бірлігі күні елеусіз қалмақ емес. Халық бұл мейрамды жыл сайын шаһардың орталық алаңында сән-салтанатымен атап өтетін. Алайда, биыл төтенше жағдайға байланысты тойлау форматы өзгермек.Мерекені онлайн форматта және әлеуметтік желілер мен блог платформалардың мүмкіндігін пайдалана отырып, виртуалды іс-шаралар ұйымдастыру қолға алынған. Аймақта 400-ге жуық іс-шара ұйымдастыру жоспарланған. Оның ішінде ақпараттық, ғылыми-танымдық және қоғамдық-мәдени бағыттар қамтылған.
– Өңір тұрғындарын қоғамдық келісім мен жалпыұлттық бірлік идеясы аясында топтастыру мақсатында облыстық ассамблеяның YouTube сайтында «Сыр бірлігі» каналы іске қосылды. Канал 5 тақырыптық бөлімнен тұрады. «Жасампаз 25 жыл», «Татулық тұғыры», «Сырлы сұхбат», «Таным сағаты» және «Біз біргеміз» бағыты бойынша белсенді жұмыс жасайды. Мұнда аймақ тұрғындарының бірлігі мен ынтымағы, татулыққа және жалпы жасампаздыққа толы игілікті жұмыстары көрініс табады, – деді өңірлік коммуникациялар қызметінде өткен брифингте облыстық Қазақстан халқы ассамблеясы хатшылығының меңгерушісі Ләйлә Төрешова.
«Береке бастауы – бірлік, ел іші тату – тірлік» қағидасын ұстанған аймақ үшін достық пен бірлікті паш ететін 1 мамыр мерекесінің орны ерекше. Бұл күні «Шәмші әндері Сыр елінде» ән шеруі, «Ел бірлігі – халықтар достығы», «Қазақстан – бірлік пен татулықтың мекені» кітап көрмесі, «Татулық тірегі – Сыр елі» атты онлайн құжаттық көрмелері, «Берекеміз бірлікте» атты поэзия сағаты, «Бейбітшілік балалар көзімен» атты балалар арасында сурет салу байқауы, мектеп оқушылары арасында «Бейбітшілік пен келісім» атты эссе жазу өткізіледі. Сонымен қатар, «Біз біргеміз» республикалық акциясы аясында қолдауға мұқтаж азаматтардың түрлі санаттарына көмек жалғасын табады.
Айтолқын АЙТЖАНОВА
