Жігіттің жігерін жанитын жол
Ертеректе бір ауыл қариясынан естіген осы бір аңыздай әңгіме мені тәнті етті. Оның мазмұнында терең мән жатыр. «Бір кісі бармақтай құсты ұстап алып торға қамап қояды. Тұтқын құс күні-түні дамыл көрмей «Отан, Отан, Отан ...» деп шырылдай береді. Құстың иесі «Мұның да Отаны болғаны ма, ал Отаны болса қайда екен?» деп құсты ұшырып жіберіп, ол қанат қаққан жаққа қарап, ғажайып елге апаратын жолды біліп алайын» деп ойлайды. Сөйтіп торды ашып, оны босатып жібереді. Ал әлгі құс ұшып шығып, бар болғаны 10 қадам жердегі тастақты тақырдың арасында өскен жалғыз түп тікенге қонады. Сөйтсе, әлгі бұтада оның ұясы бар екен. «Демек құстың Отаны – ұя салған жері болды ғой» деп ойлайды әлгі кісі. Шынында да адам түгілі құстың да отаны бар. Ал адамзат баласы үшін бауыр басқан отан оттан да ыстық. Сол қасиетті мекенді қорғап, оның қыран қанатты перзенті атанып, әскер қатарында болу – әр адамның уысына түсе бермейтін үлкен бақыт. Қала тұрғыны Нұрдәулет Пазылбеков әскер қатарында болып, сарбаз атанғанын мақтаныш тұтады. Ол отан қорғауды әр азаматтың абыройлы борышы деп санайды. Мектепті тәмамдағаннан кейін сыныптастары түрлі оқу орындарын таңдап, мамандық алуға талаптанып жатқанда, ол көп ойланбай әскерге барып, Отан алдындағы борышын өтеп келуге бекінді. Отан қорғау аманаты бабаның,
Өсиеті ақ жаулықты ананың.
Азаматтық борышымды өтеуге,
Ел қорғауға мен аттанып барамын, деп тебіренген Нұрдәулет 2017 жылы Қарағанды облысындағы Ұлттық ұланның 5451 әскери бөлімге сарбаз боп, сапқа тұрды. Құпиясы мен қиындығы мол әскери өмір де басталып кетті. Алғашқы кезде еркіндікке үйренген өмірден, қатаң әскери тәртіпке қалыптасу қиын тиді. Дегенмен, келе-келе шыңдалып, ыстық-суыққа, қиын жаттығуларға шыдап, бойда қайрат пайда болған. Жаяу әскер болып, күзгі суықтарда ағын сулардан автомат асынып жүзіп өткен. Кескілескен соғыс болмаса да, жауынгерлік қиын жаттығу сарбаздарды сан сынақтан өткізіп, қайсарлық пен өжеттікке қалыптастырған.
Әскери өмірдің мектебі менің бойымда сергектік пен сабырды, төзім мен қайсарлықты қалыптастырды. Жүрегі елім деп соққан әрбір азамат қиындыққа қарсы тұрып, отан қорғау үшін сарбаздықтың сара жолынан өту керек, – дейді Нұрдәулет.Шынында да, ел қорғаны болу – асыл мұрат. Ал, мұратқа жету үшін ер жігітке намыс керек. «Болат қайнауда, намысты ерлер майданда шынығады» деген бәлки осы болар.
Гауһар АСҚАРҚЫЗЫ
