Отан күзету – қасиетті борыш
Бүгін облыс орталығында жас жерлестерімізді салтанатты түрде әскер қатарына шығарып салу рәсімі өтті. Бұл күні 18 азамат Қазақстанның қарулы күштер қатарына алынды. Облыстық жұмылдыру пункті алаңында өткен жиынға болашақ әскерилердің ата-аналары да шақырылған.Облыс әкімі Қырымбек Көшербаев Алматы қаласындағы ҚР ҰҚК Шекара қызметінің әскери бөліміне жөнелтуге жасақталған команданы өзі шығарып салды.
– Сіздер бүгін әскер қатарына аттанғалы отырсыздар. Ата-бабаларымыздың білектің күшімен, найзаның ұшымен қорғап, бізге аманат еткен жері мен ел тыныштығын күзету – қасиетті борыш. Тұңғыш Президентіміз Н.Ә.Назарбаев өзінің «Болашаққа бағдар: рухани жаңғыру» атты бағдарламалық мақаласында: «Біздің бабаларымыз ғасырлар бойы ұшқан құстың қанаты талып, жүгірген аңның тұяғы тозатын ұлан-ғайыр аумақты ғана қорғаған жоқ. Олар ұлттың болашағын, келер ұрпағы – бізді қорғады» деген болатын. Тарихта қайсар мінезімізбен танылған елміз. Осы ретте, жауға тайсалмай тойтарыс берген Жалаңтөс Баһадүр, Жанқожа, Есет, Бұқарбай, Сартай сынды дарабоз батырлардың көзсіз ерліктері әлі талай ұрпаққа үлгі болары сөзсіз, – деді облыс әкімі.
Аймақ басшысы жас ұландарға жазушы Әзілхан Нұршайықовтың «Ақиқат пен аңыз» кітабын мерзімді әскери қызметін жоғары жауынгерлік деңгейде атқарады деген зор сеніммен табыстады.
Сонымен қатар, «ҚР Қарулы Күштерінің ардагерлері» республикалық қоғамдық бірлестігінің облыстық филиалының төрағасы Меңділдә Ршауов азаматтарға абыроймен елге оралуға тілектестік білдірді.
Айтолқын Айтжанова.
