Сәт сапар, жас түлек!
Ерекше сәт. Ерекше толқыныс. Маусымның 3-4-і күндері жас түлектер үшін соңғы қоңырау соғылды. Бұл сезімге толы соңғы қоңырау болатын. Осыдан он бір жыл бұрын мектеп табалдырығын алғаш аттаған бүлдіршіндер он жеті-он сегіздегі бозбала мен бойжеткен жасқа жетті. Бүгін олар бір-бірімен, ұстаздарымен, мектебімен қимастықпен қоштасады. Осы он бір жылдың адам өміріндегі маңызы ерекше. Үлкен өмірге қадам басады. Өз сүрлеуін іздейді. Өткен күндердің белгісі мектеп қоңырауына сағыныш оянады. Сол сыңғырлаған қоңыраудың үні соншалықты тәтті, соншалықты қимас үн болатынын түлектер алдағы уақытта сезінеді. Міне, тағы бір оқу жылы аяқталып, қаламыздағы 1881 мектеп түлегі балалық шақпен, мектеппен қоштасты.
Бұл күн – мектеп тарихында, бітіруші түлектердің есінде мәңгі өшпейтін күн. Өнері мен білімін өз бойларына өре білген еліміздің ертеңгі тізгінін қолға алар азаматтардың үлкен жолға қадам басар шағы. Болашаққа қанат қағатын бұл сәт – әрбір оқушы үшін ең бір қымбат, ең бір қимас күндер ретінде естерінде мәңгілік қалары сөзсіз.
Ересек өмірге аяқ басқалы тұрған түлектерге арналған салтанатты шара жоғары деңгейде ұйымдастырылды. Дегенмен, аймақтағы карантин режиміне сәйкес өз талаптары орындалды. Қаладағы барлық мектептерде күшейтілген санитарлық-дезинфекциялық режиммен, бекітілген тәртіпте салтанатты түрде түлектерге аттестат тапсыру рәсімі өтті. Шараға қатысушылар арасында әлеуметтік арақашықтық, алдын ала орындарының белгіленуі, маскалық режим және барынша қатысушылар санын шектеу талап бойынша сақталды. Салтанатты кешке түлектердің тек ата-анасы немесе заңды өкілдері қатыстырылды.
Биылғы оқу жылында қаламыздағы жалпы білім беретін 50 мектепті 1881 түлек бітірді. Оның ішінде «Алтын белгіге» 154, «Үздік аттестатқа» 114 үміткер бар. Барлық түлектің ішінен Ұлттық бірыңғай тестілеуге 1716 оқушы қатысуға ниетті. ҰБТ маусым айының 20-сы мен шілде айының 5-і күндері аралығында өтеді деп жоспарланған.
Түлектерді құттықтау да ерекше жағдайда өткізілді. Қала әкімі Нұрлыбек Нәлібаев барша мектеп бітірушілерді «ZOOM» бағдарламасы арқылы онлайн құттықтады.
– Түлектердің жоғары нәтижеге қол жеткізіп, үздіктер сапынан көрінуінде уақытпен санаспай қызмет жасаған мектеп басшылары мен ұстаздардың еңбегі айрықша. Мұғалім осы жолда қаншама тер төкті. Сондықтан, мен осы кездесуді пайдалана отырып ұстаздар қауымына алғысымды білдіремін. Ал, жас түлектің арманы – қалаған жоғары оқу орнына түсіп, мектептен алған білімін жалғастыру. Сіздердің армандарыңыздың орындалуы үшін бірінші кезекте білім жолында тынымсыз талпыныс, үздіксіз ізденіс қажет деп есептеймін. Бұл – біздің бүгінгідей жаңалығы желмен жарысқан заманның басты талабы. Осыны естен шығармағайсыздар. Қолдарыңызға тиген аттестаттарыңыз құтты болсын. Алдағы сынақтан жақсы нәтижеге қол жеткізіңіздер, – деген тілегін жеткізді қала әкімі.
Сонымен түлектер үшін соңғы қоңырау сыңғыры естілді. Бұл сәтте оқушылар үшін өздеріне тәлім-тәрбие берген ұстаздарына деген қимастық сезімдері сезіледі.
– Алғаш қолыма қалам ұстатып, жазу-сызуды үйретіп, әріп танытқан ұстаздар еңбегін ұмытпаймын. Оларға деген ризашылығымыз шексіз. Мұғалімдердің балалығымызды кешіріп, дұрыс жолды таңдай білуге сіңірген еңбегі зор. Жас түлектерге ұлттық бірыңғай тестілеуді тапсыруда сәттілік тілеймін. Болашақ – жастардың қолында. Жаңа өмірдегі жолдарыңыз ашық болсын, – дейді №3 мектеп-гимназиясының «Алтын белгі» иегері Анель Мұхамбет.
Мектеп бітіретін әр түлектің көзінде ұстаз жаққан от ұшқындайды. Алтын ұясымен ғана емес, балалығымен де да қош айтысып жатқан олар алдан күткен белестерде сол оттарын өшіріп алмаса екен!..
Айтолқын АЙТЖАНОВА
Суретті түсірген: Н.НҰРЖАУБАЙ
