Сенат сайлауына бюджеттен қанша ақша бөлінетіні белгілі болды
Орталық сайлау комиссиясы әр өңірге бөлетін сома сайлаушылар мен сенат депутаттығына кандидаттар санына байланысты болады. Қазақстан парламенті сенатының сайлауын өткізуге республикалық бюджеттен 254,5 миллион теңге бөлінді. Бұл туралы орталық сайлау комиссиясының хатшысы Сабила Мұстафина мәлімдеді, деп хабарлайды Sputniknews.kz.
"Сенат депутаттарының кезекті сайлауын әзірлеу мен өткізуге арналған шығыстар Орталық сайлау комиссиясына республикалық бюджеттен 254,5 миллион теңге сомасында бөлінеді", - деді Мұстафина сайлауды өткізу бойынша негізгі шаралардың күнтізбелік жоспарын бекітуге арналған отырыста.
Айтуынша, республикалық бюджеттен бөлінетін қаражат сайлау комиссияларын ұйымдастыру және олардың қызметі, мәслихат депутаттарының көлік шығыны мен іссапары, баспа қызметтері, сондай-ақ сайлау учаскелерін дайындау мен БАҚ-қа материалдар жариялауға кететін шығындар және тағы басқасына жұмсалады.
