Ақмешіт апталығы

Бүгінде оттегі баллонын жеткізу өзекті мәселе болса, бұл да жұмылған жұдырықтай біріккен ел азаматтарының бірлігімен шешімін тауып келеді. Атап айталық, «Абзал и К» толық серіктестігінің басшысы Мағжан Ерлаиев 700 дана, «Абай-Дәулет» ЖШС директоры Мұрат Сәрсенбаев 300 дана, «Ақтөбе иК» ЖШС басшысы Н.Іздібаев 700 дана, облыстық мәслихат депутаты, кәсіпкер Р.Есенов 700 дана, жеке кәсіпкер Н.Байжігітов 50 дана, «Сыбаға» ЖШС дирекәторы Л.Ризванова 40 дана, «Жомарт» қоғамдық қорының еріктілері атынан 60 дана, оттегі толтырылған баллонмен қамтамасыз етуге көмек қолын созса, белсенді азамат С.Сұлтан 10 ылғалдандырғыш сатып алып берген.  Ал «Ел Арай» қоғамдық бірлестігінің басшысы А.Байдәулетов тасымал қызметін ұйымдастыруда. Сондай-ақ, бірқатар қайырымды азаматтар 2 млн теңге көлемінде қаржылай көмек көрсеткен. Бұл орайда ерікті жастар да қарап қалған жоқ. Қолдан келер көмек болса аянып қалмауда. Оттегі баллонын тасымалдау, дәрі-дәрмек жеткізу жұмыстарына білек сыбана кірісіп кетті.

Сұраныс артқан тұста оттегін баллонымен қамтамасыз етуші кәсіпкерлер бағаны түсірді.

– Табыс тапқаным емес, халыққа көмегім тигені маңызды. Қазір сұраныс артты. Жай уақытта бір емдеу мекемесінің сұранысы 25-30 баллон еді. Қазір қалалық аурхуна 160-170 баллонға дейін қажеттілік туындап тұр. Бір оттегі баллоны 1800-2000 болса, қазір емдеу мекемелеріне 1000 теңгеден берудеміз», – дейді «Шыңғыс ЛТД» ЖШС басшысы Ерік Жүнісов.

Қала әкімінің тапсырмасымен қаладағы барлық нысандардың сантитарлық талапқа сай болуын бақылау мақсатында 14 мониторингтік топ құрылған. Құзырлы орын өкілдерінен құрылған топ күн сайын қаладағы барлық нысанды аралап, түсіндірме жұмысын жүргізуде. Бүгінгі күнге дейін 5000-нан аса нысанға барған мониторингтік топ жұмысын жүйелі жүргізуде.

Тағы бір атап айтарлығы, күн сайын қала әкімдігіндегі жауапты басшылардың жұмысы емханаларға бас сұғудан басталады. Анығын айтқанда қала әкімінің тапсырмасымен аппарат басшысынан бастап, орынбасарлар, бөлім басшыларына қаладағы денсаулық мекемелерінің жағдайын біліп, жоғын түгендеу міндеттелген.

– Қала әкімінің тапсырмасына сай күн сайын емханалардағы жағдай бақылауда. Емдеу мекемелерінің мәселесі болса, сол мезетте шешімін табуға қызмет етуге тікесінен тік тұр. Тіпті, емхана алдына орындықтар керек десе, бұл мәселе де шешімін табуда, – дейді қала әкімінің баспасөз хатшысы.

Қала әкімдігінің қиын сәтте тығырықтан шығу үшін жасаған тағы бір амалы – қала аумағындағы емханаларға қосымша көмек ретінде 23 қызметтік көлікті пайдалануға берді. Жедел жәрдем жетпей жатқан тұста қызметтік көліктің көмегіне сүйенген дәрігерлер үшін бұл да үлкен көмек болды. Бір атап айтарлығы, қала әкімдігінің мұндай қадамын өздері емес, халықтың ризашылық көңілмен айтуы алаң көңілге демеу болғаны да рас.

Бүгінде қала әкімдігі тарапынан дәрігерлердің қауіпсіздігін қамтамасыз ету мақсатында індетпен күресіп жатқан дәрігерлерді орналастыру үшін «Сырдария» лагерінен 100 орын дайын. Сондай-ақ «Қызылорда» қонақ үйінің иесі Қ.Боранбаевтың қолдауымен дәрігерлерге 137 орын берсе, «Bella Vista» кешенінің директоры Р.Ахметов қонақ үйден орын дайын екенін айтқан.

Қалада залалсыздандыру жұмысы жалғасуда. Атап айтқанда бүгінгі күнге дейін халық көп шоғырланатын аумақтарға, жалпы көлемі 6 млн шаршы метрге жуық аумаққа залалсыздандыру жұмысы жүргізілген. Бұл жұмысқа 81 адам, 8 техника, жұмылдырылып, 10 залсыздандыру тоннелі халық көп шоғырланатын орындарға орнатылған.

Қала әкімдігі осы мазмұнда хабарландыру беруде. Облыс орталығы мен қалаға қарасты ауылдарда жиын-той өтетінінен хабардар болсаңыз, қоңырау шалыңыз. Бұл сіздің елдің амандығына тілектестігіңіз, жанашырлығыңыз.