Ақмешіт апталығы

Аурудың негізгі белгілері өкпенің қабынуы болғандықтан, емдеу нысандарында оттегі баллон­дарының тапшылығы сезілуде. Аталған келеңсіздік аймақтағы ауруханаларды да айналып өтпеді. Бұл қиындықты еңсеру үшін Сыр жастары автоволонтер жобасын бастап, жұмыла күш салуда.

Облыстық жастар ресурстық орталығының бастамасымен қол­­ға алынған жобаға атсалы­су­шы жастардың саны күн­нен-күнге артып келеді. Ұйымдас­тыру­шы­лардың сөзінше, игі шараның басты міндеті – ауруханадағы оттегі баллондарын қайта тол­тыру, тасымалдау. Яғни келі­сіл­ген нысандардан босаған от­тегі баллондарын алып, арнайы мекемеден қайта толтырып әкеледі. Бүгінде еріктілер мен облыстық жастар ресурстық орталығының жанындағы ерік­тілер штабының мүшелері бұл бағытта аянбай еңбек етуде. Қол ұшын созамын деген азаматтар орталықтың әлеу­меттік желідегі парақшасына кіріп, байланыс номерін алуға мүмкіндік жа­салған. Тіпті, жастар ватсап желісінде өзара чат ашып, қажетті адам саны мен аурухана мекен жайын алмасудың да жолын тапқан.

– Сыр жастары әлеуметтік көмекке атсалысуға қашанда дайын. Коронавирус індеті өр­шіген кезде көшелерде бетперде тарату, залалсызданыру жұмысына жәрдемдесу, мұқтаж жандарға азық-түлік жеткізу секілді қайы­рымды істерге белсенді ара­ласа білді. Осы жолғы бас­тама – ұйымшыл жастардың бірлігінің жемісі. Қа­зіргі таңда ауруханалардан алған оттегі бал­лондарын «Квант» ме­кемесінен қайта толтырып жеткізудеміз. Күніне орталық ав­тобусымен 20-ға жуық оттегі баллонын қайта жасақтаймыз. Олардың басым бөлігін облыстық жұқпалы ауру­лар ауруханасы мен Қорқыт ата атындағы ҚМУ-дың 5 оқу ғимаратының жатақханасына және басқа да емдеу нысандарына жеткіземіз. Аурухана басшылары тасымал мен жұмыстың тиянақты атқарылуын қадағалап, бағыт-бағдар беріп отырады, –  дейді облыстық жастар ресурстық орта­лығының бөлім басшысы Алмат Смайлов.

Қалалық жастар ресурстық орталығы да бұл бастаманы да­мытуды қолға алған. Қаладағы көлік тізгіндеген еріктілер үйдегі науқастарға дәрі-дәрмек, керек жарағын тегін жеткізуді бастап кеткен. Күніне 5-6 көлік қала тұрғындарының игілігіне қызмет етіп, сұраныс бойынша қызмет жасауда. Ортақ ватсап чат арқылы көмекке мұқтаж жандар мекен жайы мен қажетті дәрі-дәрмек атауын жазып, көмек сұраса, еріктілер жеткізіп беруге дайын. Бүгінгі күнге дейін автоволонтерлердің көмегіне жүгінген ондаған аза­мат әлеуметтік желі арқылы ал­ғысын білдіруде. Еңбегіне ақы сұрамайтын Сыр жастары қиын-қыстау сәтте елге көмек көрсетуге әзір екендіктерін жеткізді.

– Қазіргі таңда негізгі мін­дет – науқастарға дәрі-дәрмек та­ра­ту және оттегі баллондарын тасымалдау. Қолдан келетін көмек болғандықтан, өз үлесімді қосқым келді. Достарым мен жақындарыма да алдағы уақытта атсалысуға ниет білдіруде. Бір-бірімізге көмек қолын созайық, қиын сәтте бірге болайық! Сыр елінің жастарын қайырымды тірлікке бей-жай қара­мауға шақырамын, – дейді ерікті Жоламан Аспанбекұлы.

P.S. Уақытпен санаспай, көмек көрсетуге барын салған жастардың бұл ұмтылысы келе­шекке сенім, азаматтарға күш сыйлайтыны сөзсіз. Күрделі ке­зеңде бірлігін танытып, қиын шақта жұмыла білген елдің індетті жеңер күні де алыс емес екені анық. Тек ғана бірлік бекем, ынтымақ асқақ болса, еңсермес шың, алынбас қамал жоқ.