Электрондық билет жүйесі енгізілді
Облыс орталығындағы қоғамдық көліктерге электрондық билет жүйесі енгізілді. Осыған орай, қыркүйек айынан бастап қалалық машруттарда сараланған тариф жүргізіледі. Қолма-қол төлем 120 теңге, ал электронды төлем 90 теңгеге тұрақтамақ. Бүгінде қаладағы 89 қоғамдық көлікке аталған жүйенің терминалдары мен валидаторы орнатылған.
– «Цифрлық Қазақстан» бағдарламасы бойынша облыс орталығында жолаушылар тасымалдайтын қоғамдық көліктерде электронды түрде жолақысын төлеу бойынша жұмыс жүргізілді. Соның негізінде «Қызылорда» автобус паркі» ЖШС мен «Алемпей» ЖШС, «Қызылорда облысының жолаушылар көлігі және автомобиль жолдары басқармасы», «Қызылорда қаласының тұрғын-үй комммуналдық шаруашылығы, жолаушылар көлігі және автомобиль жолдары және тұрғын-үй инспекциясы бөлімі» арасында 4 жақты келісім-шарт жасалған болатын. Бүгінге дейін 20 мың дана оқушы картасы мен 50 мың дана ересектерге арналған көлік карта келді. Карталардың сатылымы еліміздегі пандемия жағдайына байланысты біршама кешіктірілді. Қазіргі таңда автопарктің қалаішілік бағыттарында жүргізушілер арқылы көлік карталары сатылуда, – деді «Қызылорда автобус паркі» ЖШС директорының орынбасары Қанат Рахметов қала әкімдігінің баспасөз мәслихатында өткен брифингте.
Мамандардың сөзіне сүйенсек, электрондық жүйенің басымдықтары көп. Мәселен, 9 түрлі төлем түрінде жолақысын төлеуге болады, ол қоғамдық көліктердегі жолаушылар ағымының ашықтығын көрсетеді. Сонымен қатар, әрбір төленген төлем жеке тасымалдаушы кәсіпкердің жеке шоттарына түсіп отырады.
Электронды билет жүйесі – қалаішілік қоғамдық көліктердегі жолаушы мен тасымалдаушылардың өзара сенімділігін мен мәдениеттілігін қалыптастырады.
Айтолқын БАТЫРБАЙҚЫЗЫ
