ПАРТИЯ ХАТШЫСЫ ТҰРҒЫНДАРМЕН ЖҮЗДЕСТІ
Республикалық «Нұр Отан» партиясының хатшысы Ғабидолла Әбдірахымов Сыр өңіріне жұмыс сапарымен келді. Ол алдымен қаланың сол жақ жағалауындағы салынып жатқан құрылыс нысандарымен танысты. Сондай-ақ, облыс әкімдігіне мемлекеттік бағдарламаларды жүзеге асыру бағытындағы тапсырмаларының орындалуы жөнінде жиын өткізді. Оған облыс әкімі Қырымбек Көшербаев, ҚР Президенті Әкімшілігінің мемлекеттік инспекторы Нұрлан Тілешев, мәслихат депутаттары, аудан, қала әкімдері, облыстық департаменттер мен басқарма басшылары және партия активі қатысты.Одан соң партия хатшысы өңір жастары және «Жас Отан» жастар қанатының белсенділерімен бейресми кездесу өткізді. Жиынға жастар саясаты мәселелері басқармасының басшысы Еркебұлан Меңлібаев, «Жас Отан» жастар қанатының хатшысы Абылайхан Сабанбаев, аудандық жастар ресурстық орталығының директорлары, жас мәслихат депутаттары қатысты.
Жүздесуде ол мемлекет және партия тарапынан жастарға деген қамқорлықтың зор екенін тілге тиек етті.
Сыр өңіріне жасаған жұмыс сапарында партия хатшысы Қызылорда қаласына қарасты Ақсуат ауылдық округі тұрғындарымен кездесті. Жиынға қала әкімі Нұрлыбек Нәлібаев қатысты. Жиын барысында ауыл әкімі Мәмбетәлі Ақмырзаев биылғы атқарылған жұмыстарға тоқталды.
Кездесу барысында Ғабидолла Рахматоллаұлы тұрғындардың көкейде жүрген ой-пікірлерін тыңдап, ол мәселелер бойынша өз көзқарасын білдірді.
– Қызылорданың көркі ерекше екен. Мұнда сәулеті келіскен ғимараттар қалаға сән беріп тұр. Бір күнде бірнеше нысанды аралап үлгердім. Байқағаным, мұнда құрылыс қарқынды жүруде. Әрбір істе тиянақтылық байқалады, – деді ол.
Қызылорда қаласындағы көптеген келелі істерді көрген партия хатшысы оған оң бағасын берді.
Жарасхан ҚУАНЫШБАЙҰЛЫ.
