КӨМІР МЕН КҮРІШ ТЕГІН ТАРАТЫЛДЫ
Қайырымдылық – ізгі қасиет. Жаны жақсылыққа құштар жомарт жандар арамызда жеткілікті. Сый-несібе өзгемен бөліссең, өміріңе қуат, көңіліңе шуақ береді деп осындайда айтылса керек-ті.Қарауылтөбе ауылының қос кәсіпкері Асқар Бекішов пен Рүстембек Оңдашов ауылдағы аз қамтылған отбасыларға көмек көрсетіп, жақсы ісімен жақын-жуыққа үлгі болып жүр. Қоғамға пайдалы игі іс жасап, қиналғандарға қол ұшын беруде. Бұл жүректің тазалығы мен көңілдің кеңдігін көрсетеді.
Атап айтар болсақ жеке кәсіпкер Асқар Бекішов өз қаражаты есебінен 18 отбасыға 7 тонна көмір үлестіріп берді. Рүстембек Оңдашов 40 отбасына Сыр маржанын тегін таратып, ел алғысына бөленіп отыр.
– Ауылымыздың кәсіпкерлері қолынан келгенше көмектерін көрсетуде. Ауылдағы аз қамтылған және көпбалалы отбасыларға азық-түлік таратып, халықты қуантты. Халық даналығында «Жанашырлыққа – жан риза» деген сөз бар. Аз қамтылған отбасылар мен көпбалалы отбасыларға жүрек жылуын ұсыну, сауабы мол іске атсалысу – әрбір адамның азаматтық парызы, – дейді ауыл әкімі Сейілбек Тайманов.
Иә, қайырымдылық – адам өміріндегі ең игі істердің бірі. Арамызда адамгершілік қасиеті жоғары жандар бар екенін іс жүзінде тағы бір мәрте айқын аңғардық. Іздегені ізгілік, жасағаны жақсылық болған азаматтардың игі ісі көпке үлгі, жастарға өнеге.
«Ақмешіт-ақпарат»
