АЙМАҚТАҒЫ КИЕЛІ ОРЫНДАРДЫҢ 3D ФОРМАТЫНДАҒЫ КАРТАСЫ ӘЗІРЛЕНЕДІ
Бұл туралы бүгін Өңірлік коммуникациялар қызметінде өткен баспасөз конференциясында облыс әкімінің орынбасары Руслан Рүстемов мәлімдеді.
«Елбасының "Болашаққа бағдар: Рухани жаңғыру" бағдарламалық мақаласында көрсетілген мақсат-міндеттерді жүзеге асыру бойынша өткен жылы 79 жоба жүзеге асты. Биыл 72 жобаның өңірлік жол картасы әзірленді. Сонымен қатар, бағдарлама аясында жобаларды үйлестіретін "Рухани жаңғыру" өңірлік жобалық офисі ашылды. Сондай-ақ, «Қазақстанның киелі жерлерінің географиясы» жобасының бірінші кезеңі жүзеге асырылып, қасиетті орындар анықталды", - деді Руслан Рүстемұлы.
«Қасиетті Қазақстан» орталығы тарапынан 3 тілде «Қазақстанның жалпыұлттық қасиетті нысандары» және 2 тілде «Қазақстанның өңірлік қасиетті нысандары» атты кітаптары шықты. Ендігі кезекте, осы киелі орындардың 3D форматындағы виртуалды картасын әзірлеп, толық ақпарат беретін электронды бағдарлама (QR-код) жасау міндеті тұр.
