КІТАП СӨРЕСІ ТҮРІНДЕГІ ЕРЕКШЕ АЯЛДАМА
Өскеменде үлкен кітап сөресі түріндегі ерекше аялдама салынған. Аялдаманың сыртқы көрінісі ғана ерекше емес, онда қалалықтар автобусты күтіп тұрғанда уақытын пайдалы өткізе алады. Ерекшелігі сол – кешенде кітап сөресі бар.“ Алғашқы даналарын өзіміз алып келдік. Халық бұл кітаптарды алып кете алады, бірақ оқыған соң қайтарады деген үміттеміз. Бастысы кітап сөресі бос болып қалмағаны”, – дейді А.Пушкин атындағы кітапхананың өкілдері.
Мұндай кітап алмасу Еуропада кең қолданыста. Мұның аты – кроссбукинг. Ұйымдастырушылар бұл туралы өскемендіктер де біліп, қолдана бастайды деп есептейді.
Сонымен қатар, аялдама қабырғасынан түрлі туындының QR-коды болады, оны телефонға жүктеп алуға болады. “Аялдама кешенінде Wi-Fi және ыңғайлы орындықтар бар, сондықтан мұнда адамдарға ыңғайлы болады деп ойлаймын”, – дейді “Кітапхана аялдамасы” идеясының авторы Райхан Алханова. Бұл идеяны студент қыз бір ай бұрын қала әкіміне ұсынған.
Айтолқын АЙТЖАНОВА.
