«ӘКІМШІЛІК ҚҰҚЫҚ БҰЗУШЫЛЫҚТЫҢ БІРЫҢҒАЙ ТІЗІЛІМІ» ЖОБАСЫ ТАНЫСТЫРЫЛДЫ
Жаңақорған аудандық прокуратурасы құқықтық статистика және арнайы есепке алу басқармасымен бірлесіп «Әкімшілік құқық бұзушылықтың бірыңғай тізілімі» жобасын таныстырды. Жергілікті полиция қызметінің қызметкерлеріне электронды нысандағы хаттамаларды рәсімдеудің нұсқаулығын көрсетті. Бүгінгі күннен бастап аудандық жергілікті полиция қызметінің экипажы облыста алғашқы болып әкімшілік хаттамаларды электронды нұсқада толтыруды бастады. Жобаның мақсаты мен міндеті түсіндіріліп, жұмысқа қатысты ұсыныстар беріліп, пилоттық жобаны қолдану барысында орын алатын өзекті мәселелер талқыланды. Жобаға қатысқан қызметкерлерге электронды хаттамаларды толтыру үшін Жаңақорған ауданының прокуроры Н.Дүйсенбаевтың бастамасымен және аудан әкімдігінің ықпалымен алынған жаңа планшеттер мен принтер жиынтығы берілді. Жүйенің артықшылығы – әкімшілік өндірістің 30 минуттан 5 минутқа дейін қысқартылуы. Енді азаматтар түбіртекті мемлекеттік органға алып барудың қажеті болмайды, себебі, мәлімет автоматты түрде дерекқорға енгізіледі. Құқық бұзушы туралы жеке деректерді алу үшін оның ЖСН енгізу қажет, содан кейін барлық мәліметті жүйе өзі ұсынады. Аталған жоба «Сандық Қазақстан» мемлекеттік бағдарламасына сәйкес жүзеге асырылып жатқанын атап өту қажет.
