ҚАРАҒАНДЫДА ШАХТАДАН ӨРТ ШЫҚТЫ
10 наурыз күні «Костенко» атындағы кеніштің желдеткіш жалғасымы бөлігінде төтенше жағдай орын алып, өрт шыққан. Төтенше жағдай болған уақытта жер астында жұмыс істеп жүрген кеншілер бірден жоғарыға көтерілген. Зардап шеккендер мен қаза болғандар жоқ. Кеншілер медициналық көмекке жүгінбеген. Оқиға орнында «Көмір» әскериленген апатты-құтқару қызметінің құтқарушылары жұмыс жасауда. Шахтада өрттің не себепті шыққаны әзірге белгісіз. «Ауысым басшысының тапсырмасымен бірден апатты жою бойынша жоспар енгізілді. Барлық жұмысшылар жер астынан жоғарыға көтеріліп, қауіпсіз жерге орналастырылды. Өрттің шығу себептері мен жағдайы аталған оқиғаны зерттеу комиссиясының жұмысы аяқталғаннан кейін белгілі болады», - дейді «АрселорМиттал Теміртау» компаниясының баспасөз хатшысы Татьяна Богомолова.
Оның айтуынша, аталған оқиғадан кейін «АрселорМиттал Теміртау» компаниясының барлық өндіріс орындарында көмір департаментінің стандарттарына сай кезектен тыс өрт қауіпсіздігін тексеру жұмыстары жүргізілмек.
