ҚАЗАҚ ДРАМАТУРГИЯСЫНДАҒЫ ҚАЙТАЛАНБАС ТҰЛҒА
Ә.Тәжібаев атындағы облыстық әмбебап ғылыми кітапханасында «Қалағаңның қалжыңдары – халық мұрасы» атты әдеби кеш өтті. Шара белгілі драматург-жазушы, аудармашы, сыншы, қоғам қайраткері Қ.Мұхамеджановтың 90 жылдығы құрметіне арналды. Қарымды қаламгердің әрбір сөзі айналасына ой сәулесін төгіп, жүрек көзін жадыратады. Оның «Қалтай айтыпты» деген әрі терең, әрі ойға ұялай қоятын алғыр да қанатты сөздер жетіп артылады. Бұл кештің мақсаты да сол – өткір сөз, тапқыр ой, әдемі әзіл, қазақы қалжың арқылы ой тастау, тәрбиелеу, жастардың сана-сезімін ояту. «Қалтайдың кеудесінде өмірде сарқылмайтын алтын ұядай – күлкі ұясы бар. Сол ұядан оның сүйгеніне де, сүймесіне де арналған күлкілері кезектесе ұшып тұрады», – деп қазақ классигі Ә.Тәжібаев дөп басып айтқан ғой.
Бағлан ЖАРЫЛҚАПҚЫЗЫ.
