ӘЛЕМ ТАНЫҒАН ӘУЕЗОВ
Облыс орталығындағы М.Әуезов ескерткішінің жанында «Әуезов мұрасы – ұрпақ қазынасы» атты әдеби оқу кеші өтті. Шара 18 сәуір – халықаралық тарихи орындар мен ескерткіштерді қорғау күніне орай ұйымдастырылды. Қалалық орталықтандырылған кітапханалар жүйесінің бастамасымен қолға алынға шара барысында «Болашақ» медициналық колледжінің студенттері мен кеш қонақтары қарымды қаламгер шығармашылығымен кеңінен танысуға мүмкіндік алды. Осыдан 18 жыл бұрын бой көтерген ескерткіш жанында кітапхананың тұрақты оқырмандары қоғам қайраткерлерінің Мұхтар Әуезовке арнаған өлеңдерін нақышына келтіре мәнерлеп оқыды. Сондай-ақ, №10 Ы.Алтынсарин атындағы мектеп-лицей мұғалімі Қарагөз Игібаева аталмыш шараның маңыздылығына тоқталды. Ол хакім Абайды әлемге танытқан қаламгер шығармашылығын жастар арасында насихаттау арқылы өскелең ұрпақтың таным-түсінігіне сіңірудің артықшылығын сөз етті.
Шара соңында «Әлем таныған Әуезов» атты кітап көрмесі көпшілік назарына ұсынылды. Үш бөлімнен тұратын көрмеде оның зерттеу еңбектері, мерзімді баспасөз беттерінде жарияланған мақалалары, жинаққа енген шығармалары топтастырылған. Тағылымды кеш одан әрі концерттік бағдарламаға ұласты.
Бағлан ЖАРЫЛҚАПҚЫЗЫ.
