«ӨМІР ӨТКЕЛДЕРІ» КІТАБЫНЫҢ ТҰСАУКЕСЕРІ ӨТТІ
Жалағаш ауданында еңбек ардагері, белгілі қаламгер Ж.Адамбаевтың 80 жылдығы және «Өмір өткелдері» атты кітабының тұсаукесері рәсімі өтті.
Салтанатты шараны аудан әкімінің орынбасары Ж.Тажмаханов ашып, қаламы жүйрік, ойы ұшқыр, бойына ізгілік үрдісін сіңіріп, Жалағаштың қасиетті топырағынан нәр алған, әдебиет әлемінің есігін айқара ашып, талантымен танылған қарымды қаламгер Жақсылық Адамбаевтың 80 жылдық мерейтойымен және «Өмір өткелдері» кітабының тұсаукесер рәсімімен құттықтап, аудан әкімі Қ.Сәрсенбаевтың арнайы Құттықтауын табыстады.
Шарада еңбек ардагерінің өмірдерегі туралы бейнеролик көрсетіліп, қаламгер ағамыздың қаламынан туған шығармаларды жас өрендер нақышына келтіре мәнерлеп оқыды.
Салтанатты шарада аудандық ардагерлер кеңесінің төрағасы С.Алиев, Жалағаш ауданының «Құрметті азаматтары», Қазақстан Жазушылар және Журналистер одағының мүшесі Ш.Айбосынов, кент ардагерлер кеңесінің төрағасы Б.Көштаев, Жалағаш аудандық мәслихатының депутаты К.Сүлейменов, С.Қалыбаев сөз алып, «Өмір өткелдері» атты кітаптың тұсауы кесілді.
Шара соңында кеш иесі Ж.Адамбаев сөз алып, дүйім жұртқа алғысын білдірді.
