Ақмешіт апталығы

Соның бір дәлелі, құрылыс компаниялары көркейту-көгалдандыру және абаттандыруға ерекше атсалысуда. Қала әкімдігі көпқабатты тұрғын үйлердің сыртқы бейнесін сәулеттік және эстетикалық талаптарға сәйкестендіру үшін оған жергілікті кәсіпкерлерді тартты.

Туған жерге деген шынайы жанашырлығын сөзбен емес, ісімен дәлелдеп жүрген құрылысшылар қала әкімідігі тарапынан түскен ұсынысқа қолдау білдірді. Бүгінде Абай, Жібек жолы даңғылы, Тоқмағамбетов, Әуелбеков, Сүлейменов көшесіндегі 30-дан астам көпқабатты тұрғын үйдің сырт келбеті көрер көзге көркем көрінеді.

Соның ішінде Желтоқсан көшесіндегі №2 үй ұзақ уақыттан бері жөндеуден өтпеген еді. Көп жылдан бері көркі қашқан тұрғын үй келбеті қазір жасана түскен. «Нұрталап және К» серіктестігі директорының орынбасары Асқарбек Байкенжеевтің айтуынша, мұнда тек баспана сыртын әрлеу ғана емес, ескірген шатырлар мен суағарларға дейін ауыстыру көзделіп отыр. Осындай игі істі жалғастырушылар қатарында «Бақ-Береке» ЖШС директоры, қалалық мәслихат депутаты Қайрат Ерназаров, «SGS Инжиниринг» серіктестігінің директоры Нұрлан Аманбаев та бар. Кәсіпкерлердің жасаған игі ісі кейінгі жас буынға үлгі. Себебі, болашақта олар да осы құрылысшылар секілді осы бастаманы жалғастыруы әбден мүмкін.

Көпқабатты үйлердің әрлеуіне қала тұрғындары да ризашылықтарын білдіруде. Солардың бірі – Талғат Ақанұлы ұзақ жылдан бері «Универсам» мөлтек ауданында тұрады.

– Үйлеріміздің сыртқы келбеті әрленіп, жаңарып қалды. Жұмыс қарқынды жүруде. Мұндай еңбекті елеусіз қалдыруға болмайды. Енді әрмен қарай таза, әдемі етіп ұстау – әр тұрғынның міндеті, – деді ол.

Сыр өңірінің бас шаһарының 200 жылдық мерейтойына басты тарту – дарияның сол жақ жағалауындағы жаңа аудан жыл соңына дейін пайдалануға беріледі деп жоспарлануда. Мұндағы салынып жатқан көпқабатты тұрғын үйлер мен бірқатар әлеуметтік нысандар құрылыс компанияларының өз қаражаты есебінен жүзеге асуда.