ЕРЛІК ҰМЫТЫЛМАЙДЫ
Жеңіс мерекесі қарсаңында қала әкімі Нұрлыбек Нәлібаев Ұлы Отан соғысы ардагерлері және тыл еңбеккерлерімен жүздесті. Жүздесуге қатысқан 100-ден аса азаматқа мерекелік дастархан жайылып, құрмет көрсетілді.Қала әкімі ардагерлерді Жеңіс күнімен құттықтап, жүрекжарды жылы лебізін жеткізді.
– Халқымыздың даңқты ұлдары мен қыздарының қан майдан мен жеңiс сағатын жанқиярлық iстерiмен жақындата түскен тылдағы еңбектері ешқашан да ұмытылмайды. Уақыт алға жылжыған сайын бұл ерліктің шоқтығы биіктеп, қадір – қасиеті, бағасы артып, тағлым - тәрбиесі мен мән - мағынасы тереңдеп, даралана түседі. Азаматтық арды ту етіп, ерен ерліктің үлгісін көрсеткен Жеңімпаз жандарға әрдайым қамқорлық жасау біздің перзенттік парызымыз, – деді қала басшысы.
Әр жыл сайын батыр ардагерлердің қатары сиреп барады. Қазіргі таңда Ұлы Отан соғысының 17-і ғана ортамызда. Мұнан бөлек,қаламызда 1 мың 800-ге жуық тыл ардагерлері бар. Олардың ішінде 35-і тылдағы қажырлы еңбегі мен мінсіз әскери қызметі үшін бұрынғы КСРО ордендерімен және медальдарымен марапатталғандар.
Мерекелік көңіл-күйді сезінген ардагерлер мен тыл еңбеккерлері естеліктерімен бөлісіп, ізгі тілектерін жеткізді. Қала әкімі қатысқан барлық жандарға арнайы естелік сыйлықтар табыстады. Шара соңы концерттік бағдарламаға ұласты.
А.АЙТЖАНОВА
