ТІЛСІЗ ТАРИХ БОЛМАЙДЫ
Қазақ Ұлттық аграрлық университеті жанындағы «Рухани жаңғыру» орталығының директоры, профессор Хангелді Әбжанов «Тұлғатану» жобасы аясында «Қазақстанның киелі жерлерін зерттеудің маңызы» тақырыбында жастармен кездесті.Кездесуді облыстық «Рухани жаңғыру» орталығының директоры Нұрлыбек Мыңжас ашты. Шараның мәні мен мазмұнын айшықтап, жиналғандарға кездесудің мақсатын кеңінен түсіндірді. Шараға Хангелді Әбжановпен қатар, Ш.Уәлиханов атындағы Тарих және этнология институтының директоры, профессор Зиябек Қабылдинов қатысты.
Алғаш болып сөз сөйлеген Зиябек Қабылдинов «Тарих бүгіннен бастау алады» тақырыбында баяндама жасап, тарихи құндылықтарды зерделеді. Сондай-ақ, жастарды көне көз қариялардың аузында жүрген құнды деректерді қағаз бетіне түсіруге шақырды. Сонымен қатар, қазір білімнің салтанат құрған кезеңі екендігін ашып айтып, білім мен ғылым жолына шақырды.
Ал, Қазақстанның тарихынан сыр шерткен Хангелді Әбжанов жастармен қызықты мәліметтерімен, тың деректерімен бөлісті. 50 астам ғылыми еңбектің, 5 монографияның авторы әр адам төл тарихын білу керектігін айтып, оны құрметтеуге шақырды.
—Тілсіз ешқашан тарих болмайды. Сондай-ақ тарихты жасаушы негізгі үш күш бар. Ең әуелі, тарих халықтың қолымен жасалады. Екінші, олардың даналығы негізінде, үшіншіден, биліктің шешімімен қалыптасады, – деп, Қазақстанның киелі өңірлерінің тарихы мен ұлттық құндылықтарымыз төңірегінде әңгімеледі.
Биболат Сағындықұлы
