БҮГІН ШАҢДЫ ДАУЫЛ, БҰРШАҚ, ЖАУЫН КҮТІЛУДЕ
«Қазгидромет» РМК 29 мамырға арналған ауа райы болжамын ұсынады, деп хабарлайды ҚазАқпарат. Атмосфералық ауа ағындарының өтуіне байланысты Қазақстанның басым бөлігінде жаңбыр, шығыста жауын-шашын, найзағай, дауыл болады.Тек оңтүстікте және оңтүстік-батыста жауын-шашынсыз ауа райы күтіледі. Кей жерлерде тұман, шаңды дауыл болып, бұршақ жаууы мүмкін. Қызылорда облысының кей жерлерінде таңертең және күндіз дауыл, шаңды дауыл, желдің күшеюі 15-23 м/с күтіледі. Солтүстік Қазақстан, Қостанай облыстарының кей жерлерінде тұман, дауыл, бұршақ болуы мүмкін, түнде басым бөлігінде, күндіз кей жерлерінде жел 15-20 жылдамдықпен соғады. Ақмола, Ақтөбе облыстарының, таңертең және күндіз Қарағанды және Павлодар облыстарының кей жерлерінде жел күшейіп, бұршақ болуы мүмкін, Ақмола облысының кей жерлерінде дауыл болады. Түнде Алматы және Жамбыл облысының кей жерлерінде тұман күтіледі. Батыс Қазақстан, Шығыс Қазақстан облыстарының, күндіз Оңтүстік Қазақстан, Маңғыстау, Атырау облыстарының кей жерлерінде жел 15-20 м/с соғады.
