ӨМІР ЖОЛЫ ӨНЕГЕЛІ ҚАЛАМГЕР
М.Ералиева атындағы мәдениет үйінде қоғам қайраткері, журналист Мырқы Исаевтың 90 жылдық мерейтойына орай еске алу кеші өткізілді. Аталған шараны қалалық кітапханалар жүйесі мен мәдениет үйі ұйымдастырды. Тағылымды кеш «Текей батыр» кітабынан көрініс көрсетумен бастау алды. Қарымды қаламгер Сыр өңірінде қырық жылға жуық баспасөзде жемісті қызмет атқарған.
Шара барысында замандастары, бірге қызметтес болған әріптестері Қ.Мырзахметов, Р.Бекпенбетова, Ө.Жаппархан, К.Аханова журналистің еңбек жолынан естелік айтты. Ал, ұлы Мейрамбек пен қызы Гүлжамал ұйымдастырушыларға, жиналған көпшілікке алғыстарын жеткізді.
М.Исаевтың әр тақырыптағы өлеңдерін «Жас өркен» колледжі студенттері, жас оқырмандар мәнерлеп оқып, қаламгердің немерелері түрлі жанрда өнер көрсетті. Сыр өнерпаздары әннен шашу шашып, жыр-термелер орындалды.
Ақмарал ҚАДЫРХАНҚЫЗЫ.
