Атырау облысында жүкті келіншек жанармай бекітінде босанып қалды
Атырау облысында жанармай қызметкер толғағы қысқан әйелді босандыруға мәжбүр болды, деп хабарлайды Қазақпарат.Жол бойында орналасқан «ҚазмұнайГаз» жанармай бекетінің кассир-операторы Жайнагүл Құрманбекова мен Тоқжан Орынбасарова жүкті әйелді босандырды. Олар өздері жас ана болғанына қарамастан, баланы өмірге әкелуге көмектесті.
«Кешкілік бекетке такси келді. Онда екі жүкті келіншек болды. Әйгерім есімді келіншектің бірінің толғағы қысып тұрғандықтан босандыруға тура келді. Әйел қалаға дейін 5 шақырым шыдай алмайтынын түсінгендіктен, көлікті бекетке тоқтатқызған», – дейді компанияның баспасөз қызметі.
Бекет қызметкерлері жедел жәрдем шақырып, бекет ішін босандыруға дайындайды. Жедел жәрдем қызметкерлері келгенше әйелге қолдау жасайды. Дәрігерлердің өзі бекет қызметкерлерінің дайындығына ерекше таңғалады. Солардың арқасында өмірге дені сау бала келді.
Компания жетекшілері баланың есімін Берекет деп қойды. Анасына 1000 литр АИ-92 бензинін берді.
