ҚАЗАҚСТАНДЫҚ ОҚУШЫ ҚЫЗ ШАХМАТТАН АЗИЯНЫҢ 5 ДҮРКІН ЧЕМПИОНЫ АТАНДЫ
Шри-Ланканың Вакадува қаласында оқушылар арасында шахматтан Азия чемпионаты өтті. Әлем біріншілігінде қызылордалық Әсел Серікбай жеңіске жетіп, чемпион атанды, деп хабарлайды облыстық спорт басқармасының баспасөз қызметіне сілтеме жасап Stan.kz.Әсел Серікбай
№1 Қызылорда облысының олимпиадалық резервтің мамандандырылған балалар-жасөспірімдер мектебінің оқушысы Әсел Серікбай 17 жасқа дейінгі қыздар арасында рапид бойынша жарысқа түсті. Нәтижесінде ол 7 кезеңнен 6 ұпай жинап, жеңіске жетті.
Осылайша, отандасымыз 17 мемлекеттен 400 спортшы қатысқан Азия біріншілігінде 5 мәрте жеңіске жетті.
Айта кетсек, Әсел Серікбай – ҚР спорт шебері. Сонымен қатар ол шахматтан ФИДЕ шебері атағын алған. Шахматшы Қазақстанның 12 дүркін, Азияның 5 дүркін чемпионы атанған.
