Қызылорда

Қызылорда
«Сыр – Алаштың анасы» жүрегімде,
Осы жерде келгенмін бұл өмірге.
Адамзат өркениеті дамыған жер
Екі мың жыл бұрын да Сыр елінде!

Шашатын толқынымен толғана сыр,
Асаудай Сырдариям салған асыр.
Алтыасар, Жанкент, Жент қалаларын,
Өзі салған ежелгі орта ғасыр!

Өте шығар өмір ғой білінбестен,
Арғымақ, тұлпар жүйрік дүбірлескен,
Томирис ханшайым да Сыр елінде
Бес ғасыр бұрын бізде ғұмыр кешкен.

Құстары ұшып қайта қонады ғой,
Кеудемді Сыр толқыны орады ғой,
Оғыздың мемлекеті Жанкент қала,
Ұлы Жібек жолының торабы ғой.

Көзінің тамған кезде гүлге жасы,
Қосылып туған елдің бірге басы,
Қорқыт атам атымен осы жерде,
Сыр елінің қаланған іргетасы!

Бабамның арғымағы дүбірлескен,
Бұл жерде үш астанам ғұмыр кешкен,
Бірі – Жанкент – Оғыздың басы болған,
Жошының – Ақордадан тасы қонған,

Үшіншісі – Қызылордам – асыл ордам!
Келген елім бұл күнде кемеліне,
Асып-тасқан Сырымның кемері де,
Тегін бе, Елге келіп Елбасымыз:
“СЫР – АЛАШТЫҢ АНАСЫ” дегені де!

Әлемге елім-жұртым шықты бекем,
Тәуелсіз осы күнді күтті ме екен,
Тереңнен тартқан сонау астанасын,
Қазаққа Қызылордам – құтты мекен!

Сыр елін – бір-бір әлем, бұл ғалам дер,
Жау-дұшпан сауық-сайран құрмаған жер,
Шораяқтың Омары, Балқы Базар,
Нартай мен Нұртуғандар жырлаған жер!

Сырдың ақжал толқынын өлең көрген,
Ұшқан аққу-жырларын көрем көлден,
Осынау жырдың елі – Сырдың елі,
Мақтанады Әйтеке кемеңгермен!

Тұз-дәмін дүниенің тата білген,
Әр сөзін қасиетті бата білген,
Осынау жырдың елі – Сырдың елі,
Мақтанады Жалаңтөс Баһадүрмен!

Көргенмін қозылар мен ботаны мен,
Жері бай, жусан-жыңғыл жоталы кең.
Мақтанады жырдың елі – Сырдың елі,
Мұстафа Шоқайұлы отанымен!

Тойлауға келдік таулар ғаламменен,
Тойлауға келдік бүгін даламменен,
Мен бүгін мақтанамын жүз тоқсан жыл,
Жасаған Қызылордам – қаламменен!

Шөмішбай САРИЕВ.