ҚЫЗЫЛОРДАДА ІХ «BAIKONYR INVEST» ИНВЕСТИЦИЯЛЫҚ ФОРУМЫ БАСТАЛДЫ
Бүгін Қызылордада халықаралық әріптестікті дамытуға арналған ІХ «Baikonyr invest» инвестициялық форумы жұмысын бастады. Форумға халықаралық және отандық бизнес саласының өкілдері, қаржы институттары мен корпорациялардың, ғылыми-зерттеу институттарының жетекшілері, сондай-ақ, Ресей, Қытай, Өзбекстан, Иран, Турция, Оңтүстік Корея, Польша және басқа да мемлекеттердің делегациялары қатысуда. Инвестфорумның ұйымдастырушысы - "KAZAKH INVEST" Ұлттық компаниясы» АҚ қолдауымен Қызылорда облысының әкімдігі.Инвестфорумның пленарлық отырысында Қызылорда облысының әкімі Қырымбек Көшербаев қатысушыларға сәттілік тілеп, аймақтың инвестициялық мүмкіндіктері туралы баяндады.
"Атап өтуіміз керек, бұл форум алдыңғы форумдарға қарағанда өзгеше. Біз "Халықаралық әріптестікті дамыту" тақырыбын кездейсоқ таңдағымыз жоқ. Әрі Ресей, Қытай, Өзбекстан және Ираннан келген делегацияның қатысуымен секциялық отырыстарды ұйымдастырудамыз. Соңғы жылдары осы мемлекеттермен тығыз әріптестік қатынас орнаттық және алдағы уақытта да қарым-қатынас нығаяры сөзсіз", - деді облыс әкімі Қырымбек Елеуұлы.
Форум аясында қатысушылардың инвестициялық жобаларының көрмесі, сонымен қатар Ресей, Иран, Қытай және Өзбекстан елдерімен өзара ынтымақтастықтың келешегі тақырыбында секциялық отырыстар, В2В, G2B, G2G кездесулер өтті. Нәтижесінде ынтымақтастық туралы отызға жуық келісім мен меморандумға қол қойылды.
"Бізбен әріптестік орнатуға ниетті азаматтарды бірлесіп, тиімді жұмыс істеуге шақырамыз. Біз инвесторлардың барлық ұсыныс-тілегін құп көреміз. Инвесторлардың жайлы әрі тиімді еңбек етуі үшін қажетті жағдайдың барлығын жасаймыз. Жұмыс істейтін жандарды бағалаймыз және кәсіпкерлер үшін ең жақсы жағдай жасаймыз», - деді аймақ басшысы.
Форумның пленарлық отырысында ҚР Сыртқы істер вице-министрі Ғалымжан Қойшыбаев, Өзбекстан Республикасы Навои облысының әкімі Кабул Турсынов, ҚР Қорғаныс және аэроғарыш өнеркәсібі министрлігі Аэроғарыш комитетінің төрағасы Еркін Шаймағамбетов және әріптестікке мүдделі компаниялар, дипломатиялық өкілдіктер мен халыаралық және отандық қаржы ұйымдарының, даму институттарының өкілдері сөз сөйледі.
Форумның екінші күнінде меймандар түркі әлемінің абызы Қорқыт ата кешені және «Байқоңыр» ғарыш кешенінің мұражайымен танысады.
