Аграрлық саланың ауқымы кең
Былтыр Сыр өңірінде балық аулау көлемі 8 мың тоннадан асты. Бүгінгі таңда облыс бойынша балық шаруашылығына маңызы бар Кіші Арал теңізінің 18 учаскесі мен 203 көл тізімге алынған. Балық аулау көлемі соңғы 5 жылда 36 пайызға өскен. Қазіргі күні облыста жылдық қуаттылығы 11 мың тоннадан асатын 8 балық өңдеу зауыты жұмыс істейді. Онда сыртқы нарықта көксерке балығының сүбесі сұранысқа ие болып отыр. Агроөнеркәсіп кешенін дамытудың өңірлік бағдарламасы шеңберінде алдағы уақытта тауарлы балық шаруашылықтарының санын 30-ға дейін және өндірілетін балық көлемін 477 тоннаға жеткізу жоспарланған.– Сонымен қатар, биылғы жылы Қызылорда облысы 500 тонна етті экспортқа шығаруы тиіс. Мұны Ауыл шаруашылығы министрлігі бекіткен. Сондықтан облыс орталығы мен аудандарда орналасқан 4 бордақылау алаңы ашылатын болады. Сондай-ақ, Қызылорда қаласындағы ет комбинатының құрылысы аяқталады деп межеленіп отыр, – деді облыс әкімінің орынбасары Серік Қожаниязов.
Бүгінгі таңда облыста аграрлық салада ауқымды жұмыстар атқарылу үстінде. Оның үстіне аймақ тұрғындарының 60 пайызы елді мекендерде қоныстанған.
Сыр өңірінде мемлекеттік бағдарлама шеңберінде 3 млрд. текше метр тасқын су жинайтын 6 су қоймасын салу жоспарланып отыр. Олардың ішінде ең ауқымдысы – 1,5 млрд. текше метр су жинайтын «Қараөзек» және 600 млн. текше метр су жинайтын «Күміскеткен» су қоймалары. Себебі, жыл сайын Үлкен Арал теңізіне қайтарымсыз кететін 3-4 млрд. текше метр суды «Күміскеткен» және «Қараөзек» су қоймаларына жинап, егістікті сумен қамтамасыз етуге, мал және балық шаруашылығын дамытуға жағдай жасалатын болады.
Сондай-ақ, жердің пайдаланылуы мен қорғалуын қамтамасыз ету бағытында бірқатар жұмыстар атқарылған. Айталық, былтыр мемлекеттік бақылау шараларымен көлемі 43537 гектарды құрайтын жер учаскелері қамтылып, 172 құқықбұзушылық анықталған. Олардың 106-на айыппұл салынып, 38-іне ескерту түріндегі әкімшілік жазалар, 28-іне заңбұзушылықты жою туралы нұсқамалар берілген. Бүгінгі таңда салынған айыппұлдардың 94,3 пайызы өндірілген.
Биболат Сағындықұлы.
