Жеке емханалар белсенділі ерекше
Мемлекеттік әлеуметтік медициналық сақтандыру қоры үстіміздегі жылы халыққа тегін қызмет көрсететін денсаулық сақтау нысандарымен келісімшарт жасасқан. Оның негізінде тегін медициналық пакеті шеңберінде мемлекеттік тапсырысты орындамақ.– Осы жылдың қаңтар айында 74 медицина ұйымымен келісім-шарт бекітілді. Оның 30-ы – мемлекеттік, 44-і – жекеменшік емханалар. Өткен жылмен салыстырғанда жекеменшік емханалардың саны 16 пайызға жоғарылады. Одан бөлек жеке клиникалармен ұсынылатын медициналық көмек түрлері кеңейтілді. Мәселен, биыл оңалту және қалпына келтіру көмегін көрсету, стоматологиялық қызметтер бойынша жеке клиникалардың саны артқан, – деді өңірлік коммуникациялар қызметінде өткен баспасөз мәслихатында «Әлеуметтік медициналық сақтандыру қоры» АҚ облыстық филиалының директоры Руслан Бектібаев.
Сондай-ақ, үстіміздегі жылы жекеменшік медицина ұйымдары стационарды алмастыратын көмек түрлерін көрсетуге белсенділік танытуда. Оның ішінде стационарлық көмек, амбулаторлық-емханалық көмек, ауылдағы амбулаторлық-емханалық көмек және консультациялық-диагностикалық көмек бойынша жеке жеткізушілер санының өсуі байқалған.
Ал облыстық денсаулық сақтау басқармасы басшысының орынбасары Олжас Ысқақовтың мәлімдеуінше, міндетті әлеуметтік медициналық сақтандыру жүйесі 2020 жылы толық енгізіледі.
– Бұл бастама денсаулық сақтау саласының жұмысын жандандырады. Былтыр 23 қосымша аймақ ашылған болатын. Цифрлы технология – аталған жүйенің алғышарты. Бүгінгі таңда аудандар мен шалғай елді мекендерде ғаламторды пайдаланады. Яғни, қағазсыз айналымды қолға алуда белсенділік таныту қажет, – деді О.Ысқақов.
Айтолқын БАТЫРБАЙҚЫЗЫ.
