СОҒЫС АРДАГЕРІ АТЫНА КӨШЕ БЕРІЛДІ
Ұлы Отан соғысы және еңбек ардагері Орман Ілиясов ағамыздың есімін есте қалдыру мақсатында Жаңақорған кенті, "Саяжай" мөлтек ауданынан көше есімі берілді. Сонымен қатар, аудандық спорт кешенінде Орман Ілиясұлын еске алуға арналған волейболдан аудандық турнир өткізілді.
Ол кісі 1916 жылы Жаңақорған ауданындағы №3 ауылында, яғни қазіргі Қыркеңсе ауылдық округінде дүниеге келген. Небәрі 22 жасында Қызыл Армия қатарына алынған Орман ағамыз отты жылдардың алғашқы күнінен майданға кіріп, Жеңіс күнін кірпік қақпай қарсы алды. Днепр үшін соғыстың қызған шағы, қарша бораған оқ талайдың тағдырын қиып та кетті, осы шайқаста аға сержант Орман Ильясов басынан жарақат алып, госпитальға жіберілді және ерен ерлігі үшін кеудесіне "Қызыл Жұлдыз" ордені тағылды.
1947-1953 жылдары №160 "Талап" орта мектебінде мұғалім, мектеп директоры қызметтерін атқарды. Ұзақ жылдар бойы осы мектепте мұғалім болды. Ұрпақ тәрбиесіндегі сүбелі еңбегі үшін "ҚазССР Халыққа білім беру үздігі" төсбелгісімен, "Еңбек ардагері" медалімен марапатталды.
