ҒАЛЫМДАР ДЕНЕДЕ ДӘРІ ТАСЫМАЛДАЙТЫН РОБОТ ЖАСАП ШЫҒАРДЫ
Германия ғалымдары ағзаның зақымданған бөлігіне дәрі-дәрмек тасымалдайтын мини-роботтар жасап шығарды, деп хабарлайды Baq.kz ақпарат агенттігі tass.ru сайтына сілтеме жасап.Штутгарттағы интеллектуалдық жүйелер институты ғалымдарының мәліметінше, аталған мини-робот жүзіп, секіріп және өрмектей алады. Бұл роботтың көлемі – 4 мм. Ол жұмсақ полимерден әзірленген. Осының арқасында ол басқа роботтарға қарағанда жылдамырақ қозғалады. Ғалымдардың айтуынша, осы роботтың арқасында дәрігерлер болашақта дәрілерді науқастың денесіне үлкен түтікшелердің көмегінсіз енгізе алады.
«Біз оны барынша оңай жолмен пайдалануды жөн көріп отырмыз. Ол науқастың денесіне аузы немесе терісіндегі кішкене тілінген жер арқылы енгізіледі», - дейді физикалық ақыл бөлімінің директоры Метин Ситти.
Ғалымдар бұл роботты жасау кезінде медуза, жұлдызқұрт және қоңыздардың қимыл-қозғалысын бақылаған. Құрылғының полимерлі қабатына магнит орналастырылған. Мамандар оның көлемі мен қозғалысын сырттан магнит арқылы өзгертіп, басқарып отыра алады.
