ШЕКСПИР ШЫҒАРМАСЫ КӨРЕРМЕН НАЗАРЫНА ҰСЫНЫЛДЫ
Нартай Бекежанов атындағы театрда У.Шекспирдің «Макбет» трагедиясының премьерасы қайта жаңғыртылып көрермен назарына ұсынылды.Тақ таласы, қатыгездік тудырған жауыздық, судай аққан адам қаны – біздің күнделікті өміріміздің өзекті проблемасына айналды. Адам-адамға дос пейілден айрылып, адам-адамға қасқыр заман бірте-бірте біздің жан жүрегімізді жаулап келе жатқандай.
Айнала үрей, қорқыныш.
Жауыздық жолына түскен Макбетті құрдымға одан әрі итермелеген Леди Макбет.
Адалдық әдірәм қалған заман.
Қанға боялған Макдуфтың жанұясы. Ақыры өз қанына өзі шомылған Макбет, күлге айналған жезтырнақ мыстандар, есінен айрылған Леди Макбет... Осылай ширыға түскен оқиға көпшіліктің көңіліне шықты. Қайта жаңғыртылып көрерменге ұсынылған «Макбет» трагедиясының басты ролін яғни, Макбетті Қазақстан Жастар одағы «Серпер» сыйлығының лауреаты, «Мәдениет саласының үздігі» төсбелгісінің иегері Бақытбек Темірбеков сәтті сомдап шықты. Сонымен қатар, Леди Макбетті Мәдениет қайраткері Зәлипа Төлеповада көрерменге шынайы жеткізе білді.
