ТҰҢҒЫШ ПРЕЗИДЕНТ КҮНІНЕ ОРАЙ МЕРЕКЕЛІК ШАРА ӨТТІ
Қалалық білім бөлімінің ұйымдастыруымен 1 желтоқсан – Тұңғыш Президент күніне орай «Алтын ұя» балабақшасы базасында мерекелік түрлі іс-шаралар ұйымдастырылды.
«Менің Тұңғыш Президентім» тақырыбында «Ақбота» ортаңғы тобында ашық оқу тәрбие сағаты, «Мен өз елімді мақтан тұтам» тақырыбында ІІ кіші және ортаңғы топтар арасында үш тілде мәнерлеп оқу сайысы және «Елін сүйген - Елбасы» тақырыбында ересек топтар арасында мерекелік ертеңгілік өткізіліп, «Тұңғыш Президент және Менің Отаным» тақырыбында бейне роликтер көрсетілді. Шараға ата – аналар қатысты.
Сондай-ақ, «Жас мамандар» мектебі жетекшілерінің ұйымдастыруымен жас мамандардың жұмысқа деген қызығушылығын арттыру, патриоттық сезімдерін ояту, танымдық интеллектуалдық білімін кеңейту мақсатында «Қазақстанның болашағы - білімді жастар» тақырыбында «Не? Қашан? Қайда» форматында интеллектуалды сайыс жас мамандардың қатысуымен өткізілді.
Іс-шара соңында балабақша меңгерушісі бүлдіршіндерді дипломдармен марапаттап, Елбасы жайлы арнайы кітаптарды сыйға тартты. Балабақша бүлдіршіндері Елбасына деген сағынышын, ілтипатын, құрметін ән-шашумен жеткізіп, бейбітшілік заманда өмір сүріп жатқандығы үшін зор алғыстарын білдірді.
