Ақмешіт апталығы

Белгілі публицист, Қазақстанның еңбек сіңірген қайраткері Қайнар Олжай бүгінгі семинардың арнайы қонағы болды. Ол Сыр журналистеріне ақпаратты жазу тәсілдері мен публицистикалық қадамдар туралы ойларын ортаға салды. Сонымен қатар, мақаланың  формасы мен жіберетін қателіктер тұрғысында тәжірибесімен бөлісті.

 Қайнар Олжай бұқаралық ақпарат құралдарында өзіндік қолтаңбасы бар талантты тұлға.  Осы саланың дамуына зор үлес қосқан. Әлі де білімі мен білігін журналистика саласына жұмсап келеді.  Семинар-тренингтің «Жазу тәсілдері» бөлімінде «журналистерге не керек»? «тақырыпты қалай қою керектігі» жөнінде айтып берді.

 – Қазіргі таңда осы сала мықты болу үшін көп оқу қажет. Бүгінде кітап оқып, ізденетіндер қатары азайған. Журналистика көп оқуды қажет етеді. Ең бірінші қазақ тілін жоғары дәрежеде білу керек. Қазақ тілінің жазылуы, әрбір тыныс белгінің қойылуы мақала жазғанда көрініп тұрады. Газеттегі мақаланы қаншама адам оқиды. Сондықтан да оқырман қате жібермеу үшін журналисттің сауатты болуы маңызды. Екінші пән ретінде психологияны айтар едім. Біздің салада тікелей әр түрлі адамдармен тіл табысуға тура келеді. Осы тұрғыда қасыңдағы жанның не ойлап, қандай күйде тұрғанын білу маңызды. Сонымен қатар, логиканы оқудың да маңыздылығы зор. Бүгінгі журналисткаға жүйе керек. Таза логикамен жұмыс жасаған оңай болады. Ал жүйе мен логика жазуға шеберлікті қалыптастырады, – деді Қайнар Олжай.

«Журналистердің ең ақсайтын жері тарих». Белгілі публицисттің бұл айтқаны толықтай орынды. Расында, бүгінде тарихты толық білетіндер көп емес.

Қайнар Олжай екінші бөлімде мәтінді редакциялаудың бірнеше түріне қатысты, БАҚ беттерінде жарық көрген мәтіндерге талдау жасады. Жас журналистердің сұрағына жауап берді.

Семинар соңында белсенділік танытып, өзекті сұрақ қойған журналистерге өзінің «Қой баққан қиын» атты кітабын ұсынды.

«Болмасаң да ұқсап бақ» деп Абай айтқандай, бүгінгі семинар-тренинг тілшілік тіршілікте үздік болсам дейтін жас журналистерге шабыт сыйлағаны анық.