Ұстаз еңбегі ұрпаққа үлгі
Қорқыт Ата атындағы Қызылорда мемлекеттік университетінде «Су шаруашылығы және жерге орналастыру» кафедрасында техника ғылымдарының докторы, профессор Серікбай Иманбайұлы Қошқаров атындағы дәрісхана ашылды.Салтанатты шараға облыс әкімінің орынбасары Наурызбай Байқадамов, облыстық мәслихат хатшысы, академик Қылышбай Бисенов, университет ардагерлер кеңесінің төрағасы, профессор Қазыбек Құдайбергенұлы қатысты.
Дәрісхананы ашудағы басты мақсат – студенттерді болашақта өз мамандығын сүюге, кәсіби және жеке өмірлік жетістіктерге жетуге, рухани құзіреттілігін дамытуға баулу.
Серікбай Қошқаров 1945 жылы Сырдария ауданында дүниеге келген. 1959 жылы сол ауданның 15-ші разъезіндегі жеті жылдық орыс мектебін, одан кейін Қызылорда гидромелиоративтік техникумын үздік бітірді. Ал, 1968 жылы Жамбыл гидромелиорация-құрылыс институтын «Гидромелиорация» мамандығы бойынша қызыл дипломмен аяқтаған.
Алғашқы еңбек жолын1968 жылы Тасбөгет қыстағындағы 29-шы жылжымалы механикаландырылған колоннасында күріш суармалы жүйесі құрылысында мастер қызметінен бастады. Өзінің кәсіби шеберлігі мен жауапкершілігі арқасында одан кейінгі жылдарда білім саласының өркендеуіне өлшеусіз үлес қосты. Бүгінде осы оқу ғимаратында «Су шаруашылығы және жерге орналастыру» кафедрасының меңгерушісі қызметін атқаратын профессордың су шаруашылығы мәселелерін шешудегі еңбегі зор.
– Жастар білім саласының қайраткерлерін, ғалымдар мен белгілі ұстаздарды ұмытпауы тиіс. Серікбай Қошқаров секілді азаматтардың өмірінен бүгінгі жастар рухани күш, өнегелі тәрбие алады деген сенімдеміз, – деді облыс әкімінің орынбасары Н.Байқадамов.
Шара барысында техника ғылымдарының докторы, профессор Сұлтанбек Тәуіпбаев, филология ғылымдарының докторы, профессор Бағдат Кәрібозұлы, облыстық көлік инспекциясының бастығы Нәжмадин Шамұратов ұстаз жайлы жүрекжарды лебіздерін білдірді.
Айтолқын БАТЫРБАЙҚЫЗЫ
