Бюджеттің берекесі артты
Жасыратыны жоқ, қазына қор дәулетті болса қолың ұзын, ісің ілгері болады. Мұны Қызылорда қаласының бюджетінен-ақ байқай аламыз. Айталық, бюджет 2019 жылдың басында 42,9 млрд. теңге көлемінде бекітіліп, жыл қорытындысымен 77,3 млрд. теңгеге жетті. Бұл дегеніміз бюджет бағамының жыл басынан бері 80 пайызға ұлғайғанын көрсетті. Әрине, кәсіпкерлік пен өңдеу саласындағы толымды тірлік осындай озық жағдайға жеткізді.Ал, ауыл шаруашылығы саласының да өз биігі бар. Мемлекет мүмкіндігі диқандарды да демеп, түрлі жеңілдіктер жасады. Соның нәтижесінде өнім көлемі 8 млрд. теңгеден асты. Ауылшаруашылығын әртараптандыру бағытындағы жүйелі жұмыстың қайтарымы 20 мың 885 тонна күріш жинауға жол ашты.
Сол секілді мемлекеттік бағдарламалардың игілігі орасан олжа әкелгенін айтпасқа болмайды. Шаруасын баққан шаруа қожалықтары 264,3 млн. теңге жеңілдетілген несие алып, қала бойынша мал басы күрт өсті, саны 58 мыңға жетті.
