Оқушылар сөрелерін мақал-мәтелмен безендіруде
«Менің өмірімдегі қолданылатын мақал-мәтелдер» жобасы аясында Қызылорда қаласындағы Назарбаев Зияткерлік мектебінің оқушылары өздерінің жеке заттарын сақтайтын шкаф-локерлерін отбасының өмірлік ұстанымына айналған мақал-мәтелдермен безендіруді қолға алды.
Білім, ғылым, достық, еңбек және адамгершілік секілді түрлі тақырыптағы тәрбиелік мәні зор нақыл сөздер бүгінде мектептің ішкі келбетін ерекше әсемдей түсті. Әрбір оқушы отбасымен бірге мақал-мәтелдердің шығу тарихын зерттей отырып, өздерінің өмірлік ұстанымдары ретінде таңдап алған мақалдарды оқушылардың мектептегі жеке шкафтартарына іліп, өзгелерге таныстыруда.
– Бұл өте жақсы бастама. Себебі мақал-мәтелдер жастардың тіл байлығын дамытып, ұлттық құндылықтарды дәріптеуге үйретеді. Сондай-ақ келелі ой мен кең мазмұнды нақыл сөздерді өмірде қолдана біледі, – дейді жобаға қатысушы ата-ана Зәуре Абуова.
Мектеп ата-аналарының белсендісі – Ақпановтар әулеті «Отбасы – тәрбиенің басты ұясы» деген халық даналығын ұран ретінде пайдаланады екен. Олардың айтуынша жанұядағы келісім мен мейірім адам бойындағы жақсы қасиеттердің қалыптасуына үлкен септігін тигізеді.
– Баланың алғашқы тәрбие алатын орны – ол, әрине, отбасы. Анам мен әкем маған үнемі қамқорлық көрсетіп, менің қызығушылықтарыма көңіл бөледі. Соның арқасында мен өмірде үлкен жетістіктерге қол жеткізіп, жан-жақты тұлға болып қалыптасудамын, – дейді 10-сынып оқушысы Нұрай Амангельді.
