COVID-19: Соңғы тәулікте науқас тіркелген жоқ
Бүгінгі таңда облыс бойынша вирус жұқтырған 245 науқас тіркелген. Емделіп шыққаны – 188. Оның ішінде 28-і медицина қызметкері. Бұл туралы Өңірлік коммуникациялар қызметінің ақпарат алаңында өткен брифингте облыстық денсаулық сақтау басқармасының басшысы Жақсылық Абдусаметов мәлімдеді.«Коронавирус анықталған азаматтардың жасына сәйкес бөлінісі: 0-14 жас – 23 азамат, 15-19 жас – 11 азамат, 20-29 жас – 71 азамат, 30-39 жас – 37 азамат, 40-49 жас – 40 азамат, 50-59 жас – 31 азамат, 60 жастан жоғарылар – 32 азамат. 15 мамыр күні 8 жағдай анықталған болатын. Бұл азаматтардың барлығы Тенгиз Шевройл компаниясының қызметкерлері»,-деді бас дәрігер.
Коронавирус инфекциясы анықталған азаматтармен байланыста болған – 3343 азамат, оның тікелей қарым-қатынаста болғаны –1869, жанама қарым-қатынаста болғаны – 1474 азамат.
Облыс бойынша 15 мамыр күні барлығы 669 сынама алынды. Нәтижесінде 338-і теріс мәнді, оң мәнді сынама жоқ. Ал 281 сынамамен жұмыс жасалуда.
Құрметті қызылордалықтар, сақтық шараларын қатаң сақтаңыздар! Сонымен қатар, сырт өңірлерден келген азаматтар болса, жергілікті медициналық мекемеге хабарласуын сұраймыз.
