Емдеу нысандары жұмысына кірісті
Қазіргі таңда елімізде қауіпті індетпен сырқаттану жағдайы тұрақтанғаны байқалады. Бүгінде қиын кезең артта қалды. Иә, халқымыз өте ауыр сыннан өтті. Дегенмен, әлі де немқұрайлылық танытуға болмайды.Ресми мәліметтерге сүйенсек, соңғы үш аптаның ішінде санитарлық талаптардың күшейтілуінің нәтижесінде барлық өңірде халықтың аурушаңдығы айтарлықтай төмендеген. Ел бойынша орташа алғанда аурудың тәуліктік өсімі 2 есеге азайған. Осыған орай инфекциялық және провизорлық төсек-орындар жүктемесі азайып отыр.
Аймақтағы ахуал да көңіл көншітерлік. Халық арасында дүрбелең басылған секілді. Бүгінде эпидемилогиялық жағдайға байланысты ашылған 360 төсек орынға арналған провизорлық стационар, 60 төсек орынға арналған облыстық тері-венерология диспансері мен 40 төсек орынға арналған Қызылорда теміржол ауруханасының провизорлық стационары өз жұмысын токтатты. Ал емдеу орындары жоспарлы жұмысын бастады.
– Бастапқы медициналық-санитариялық көмек көрсету деңгейінде уақытша тоқтатылған скринингтік, профилактикалық тексерулер, жоспарлы стоматологиялық және оқушылардың денсаулығын қорғау қызметтері, реабилитация, денсаулық мектептерінің жұмысы мен психологиялық көмек көрсету қызметтері өз жұмысын жалғастырады. Сондай-ақ облыстық фтизиопульмонология орталығының 120 төсек орынға арналған инфекциялық стационары жабылып, 100 орынға арналған провизорлық стационар болып қайта жабдықталады. Бұған қоса, 10 тамыздан бастап көпбейінді қалалық аурухананың 210 орынға арналған провизорлық стационары да жабылып, залалсыздандыру жұмыстары жүргізілгеннен кейін шұғыл және жоспарлы емдеу жұмыстарына кірісетін болады, – деді облыстың бас дәрігері Сәбит Пазылов.
Өңірде қауіпті індеттің тұрақталуына байланысты облыстық көпбейінді ауруханасы жоспарлы түрде ем қабылдауды бастады. Пандемия кезінде төрт ай бойы аталған қызмет тоқтатылған еді. Бүгінде ауруханада жедел түрде түскен 370 науқас емделуде. Одан бөлек, 525 төсек қоры дайын тұр. Жоспарлы түрде емделуге келген науқастарға шектеу болмайды.
– Эпидемиологиялық ахуалдың тұрақтауына байланысты науқастарды қабылдауды бастадық. Алғашқы күні 12 науқас келіп түсті. Оның ішінде төртеуі көз бөліміне, біреуі хирургия, екі науқас жалпы терапия бөлімдеріне жатқызылды. Осы уақытқа дейін барлық емханамен тығыз байланыс жасалды. Емделушілерге нейрохирург, кардиохирург, жалпы барлық дәрігер онлайн түрде кеңес беріп отырды. Емханаларда диспансерлік есепте тұратын сырқаттармен де Whatsapp, Skуpe арқылы сөйлесіп, кеңес бердік. Қазір барлық науқасты қабылдауға толық мүмкіндігіміз бар, – дейді облыстық көпбейінді ауруханасы директорының хирургиялық қызмет жөніндегі орынбасары Алмас Әбілпатта.
Халық ауруханада қажетті ем-шараларын алғанды жөн санайды. Жоспарлы түрде науқастарды қабылдау басталғаны жөнінде естіген тұрғындар ауруханаға жолдама ала бастаған.
Айтолқын БАТЫРБАЙҚЫЗЫ
