Әкімін тыңдамаған әлеумет...
Жер жүзін жайлаған коронавирустан көз жұмғандар күн сайын артып отырғаны көзіқарақты көпшілікке етене таныс. Оның осылайша кеңінен жайылуына бірден-бір себеп халықтың сақтық шараларын сақтамауынан. Билік тарапынан сәт сайын ескертіліп жатса да ережені елеусіз қалдырып жатқандар қатары да артып отыр. Алайда әлем елін әбігерге салған ауруға немқұрайлық танытып, той жасап желігіп жүргендер де тиылмауда. Оларға заң шеңберінде қатаң тыйым салынып, айыппұл төлемі тағайындалады.
Осы орайда, өткен аптада қала әкімдігінің мәжіліс залында шаһар басшысы Нұрлыбек Нәлібаевтің төрағалығымен қаладағы карантиндік шектеу шараларын пысықтау мақсатында мәжіліс өтті.
Мәжілісте Ақсуат ауылдық округіне қарасты Ж.Махамбетов ауылында болған тәртіпсіздік талқыланды. Атап айтар болсақ, 13 тамыз күні ауыл тұрғыны тыйым салынған шектеулерді ескермей, 100-ге жуық адам жинап, той жасаған. Тойдың өту барысында бір тұрғын атыс қару қолданып екі бүлдіршінді жарақаттаған. Аталған тәртіпсіздіктің орын алуына жол берген Ақсуат ауылдық округінің әкімі бұл мәселеге қатысты пікірін «Той егесіне ауызша да, жазбаша да ескерту жасадым. Менің ескертуімді назарға алмай той жасады» деп қысқа қайырды.
Пандемия уақытында ауылдың қоғамдық-саяси ахуалын тұрақты бағытта ұстай алмай, тойдың болғанын қала әкімдігіне дер кезінде хабарламағаны үшін, шарасыздық танытқан округ әкімі Мәмбетәлі Ақмырзаевқа шаһар басшысы қатаң сөгіс жариялады. «Ауыл тұрмысын түзетуде атқарған жүйелі еңбектеріңізді ескеріп, қатаң сөгіспен қалдырдым» деген шаһар басшысы басқа да кент және ауылдық округ әкімдеріне өздеріне сеніп тапсырылған аумақта бақылауды арттырып, алдын-алу шараларын күшейтуді нықтап тапсырды.
Сондай-ақ, ауылдық округтің аймақтық полиция қызметкерін дер кезінде қажетті шараларды қолданбай, тиісті органдарға хабарламағаны үшін тәртіптік жауапкершілікке тартуға қалалық полиция басқармасына нұсқау берді.
Бұған дейін қалаға қарасты Қызылжарма ауылдық округінде ауыл тұрғыны аулада той өткізбек болған. Алайда той қалалық мобильді топтың араласуымен уақытында тыйым салынды. Аталған мәселеге байланысты ауыл әкімі Медет Сейіловтің орын алған оқиғаны дер кезінде хабарлағаны ескеріліп, ескерту берілді.
Н.Нәлібаев қала әкімдігінің Әдеп жөніндегі уәкілі мен сала басшыларына кент және ауылдық округ әкімдерінің қызметіне талдау жасап, қызметіне қатысты ұсыныс беруді жүктеді.
Мәжіліс қорытындысында шаһар басшысы ауыл әкімдеріне карантин талаптарын сақтауда жоғары жауапкершілікпен жұмыс жасау керектігін қатаң ескертті.
Асылы, әкімін тыңдамаған әлеумет тойдың соңы тауқымет боларын ұққан шығар. Ортадағы елағасын ескермеген ел оның қанжығасына қатаң сөгіс байлағанын біліп жүрер...
Тұрар БЕКМЫРЗАЕВ
