Ақмешіт апталығы

Баспасөз турының алғашқы нысаны Қызылжарма ауылдық округі болды. Мұн­да жол жөндеу, жарықтандыру, ауыз су және электр қуатымен қамтамасыз ету бағытында жұмыс атқарылуда. Ең бас­тысы, ауыл тұрғындарының сұранысы бойын­ша жол мәселесі жүйелі шешім тап­қан. Қызылжармалық ағайын қала құра­мына енгенімен, елді мекендегі жол жайының шешім таппағанына наразы еді. Тіпті, кей көшеде жауынды күні жаяу адам тұрмақ, көлікті кісінің қатынауы қиынға соққан. Енді, міне, халықтың мұң-мұқтажы ескеріліп, ауылдағы жолдар жөндеуден өтуде.

Қазіргі таңда Қызылжарма ауылдық округіндегі 120 көшенің 80 проценті жөн­деуден өтті. Биылдың өзінде ауылдағы 18 шақырымға жол жөндеу жұмысы ұйым­дастырылса, қалған бөлігіне жоба-смета­лық құжат әзірленген.

– Ағымдағы жылы Қызылжарма ауыл­­дық округінде «Өңірлерді дамыту-2020», «Жұмыспен қам­тудың 2020-2021 жылдарға арналған Жол картасы» мемлекеттік бағ­дарласы негізінде 21 кө­шеге орташа жол жөндеу жұмыстары жүр­гізіл­ді. Оның ішінде 13 көшеге асфальт, 8 көшеге қиыршық тас төселді. Бағдарлама аясында ауылдық округ тұрғындарынан 65 адам жұмысқа тартылған, – деді Қызылжарма ауылдық округінің әкімі Медет Сейілов.

Ауыл көлемінің ұлғаюы жаңа тұрғын ауданның бой көтеруіне жол ашуда. Ауыл­дық округте Қызыл­жарма-1 Қызылжарма-2 секілді тұрғын аудан пайда болған. Бүгінде Қы­зылжарма-2 тұрғын ауданында 12 көше бар. Әкімдік ендігі кезекте мұндағы инфрақұрылымды оңтайландыруға күш салып, тұрғындарға қолайлы жағдай жасауды көздеуде. Мәселен, 2018 жылы Қызылжарма-2 тұрғын ауданына 23 ша­қырымдық тас төсеу бойынша жоба-сметалық құжат әзірленіп, 2019 жылы республикалық бюджетке ұсынылған. Ал биыл жұмыстарды бастауға қалалық бюджет 3 млн теңге бөлді. Қазіргі таңда аталған қаржыға тегістеу, көшелерді ретке келтіру жұмысы қолға алынған. Алдағы уақытта республикалық бюджеттен қар­жы қаралса, қалған құрылыс жұмысы аяқталатын болады. Бұдан бөлек, ауыз су, жарықтандыру жұмысы да жүргізілуде.

«Шет аймақ» бағдарламасы аясында тұрғындарды ауыз сумен қамту мәселесі де оң шешімін тауып келеді. «Мелиоратор» мекемесі ауылдың жаңадан қоныстанушы Қызылжарма-2 тұрғын ауданына 53,6 шақырым болатын ауыз су құбырын тарту жұмыстарын бастаған. Мердігер мекеме өкілдері құрылыс барысында отандық өнімге басымдық беретінін және сапа деңгейін қадағалайтынын жеткізді. Жүйелі жоспар ретімен орындалса, жыл аяғына дейін тұрғын аудандағы 300-дей отбасы сапалы ауыз судың игілігін көр­мек.

Бұдан бөлек, ауыл­дық округтегі кө­лік қозғалысы мен жаяу жүргіншілердің қауіпсіздігін қамта­ма­сыз ету үшін түнгі жарық бағана­сын орнату, электр көзімен қамту ісі қар­қынды жүруде. Мы­салы, биыл ауылда 7 көше жарықтандырылып, 8 көше­де тозығы жеткен электр бағанасы жаңартылған. Бұл жоба аясында бір фазалы 450 жеке тұрғын үйге, үш фазалы 35 жеке тұрғын үйге электр есептегіш ақысыз не­гізде орнатылуда.

–  Еуропа қайта құру және даму банкі бойынша Қызылжарма ауылына 6,5 шақырым 10 кВ әуе желісі мен 4 қосалқы станция қаралған. Олар орнатылып, қолданысқа берілді. Ал, 0,4 кВ әуе желісі бойынша 4,4 шақырым электр бағанасын жаңарту жұмысы жақын арада бітеді. Қазіргі таңда ауылдық округтегі электр бағанасының 60 проценті ауыстырылды, – деді Қы­зылжарма ауылдық электр торабы инженері Әкімбек Құранов.

Келесі табан тіреген мекен – Қос­шыңырау ауылдық округінің халқы биыл біршама игі тірліктің куәсі болды. Мұндағы ағайынның басты базынасына айналған жол мәселесі шешім тауып, көшелерге орташа және күрделі жол жөндеу жүргізу қолға алынған.

Биыл ауылдық округте 5 көшеге тас төселіп, 2 көше асфальтталды. Мәселен, Абай ауы­лында барлығы 17 көше бол­са, оның ішінде 16 көшесі жолмен қам­тылған. Ауыл әкімі ендігі кезекте Досан ауылының жолдарын жөндеуге басымдық беретінін жеткізді. Өз кезегінде елді ме­кен тұрғындары әкімдік тара­пынан жа­салған қол­дауға алғаусыз ал­ғысын айтып, өзге де күрмеулі мәселенің ше­шім табанына сенім білдіруде.

– Кез келген өзек­ті мәселені ауыл­­дағы қоғамдық кеңес­­пен ақылдасып шешеміз. Есеп беру кездесуде халық көтерген мәселелер міндетті түрде на­зарға алынып, тұрақты бақылауда бо­лады. Соның бір мысалы, тұрғындардың сұранысының нәтижесінде Досан ауылына 3 көшеге тас төсеу, Абай ауылындағы Ю. Гагарин көшесін асфальттау жұмысы қолға алынды. Сонымен қатар, Абай ауылындағы Махамбетов пен Бейбітшілік көшесінде көше жарығын тұрақтандыру мақсатында қосалқы станциясы орна­тылмақ, – деді Қосшыңырау ауылдық округінің әкімі Дулат Таубай.

Әкімнің сөзінше, ел тілегі ескеріліп, Абай ауылында көпшілікке арналған спорт алаңын салу және мәдениет Үйінің төбесін жұмсақ жабынмен жабу жұмысы жүргізілсе, Досан елді мекенінде №20, 15 көшелерге  жарық бағаналары орнатылған.

Баспасөз турының қортындысында қала әкімінің орынбасары Асқарбек Есжанов шаһар иелігіндегі ауылдарда атқарылған жұмыстарға тоқталды:

– Биыл қалаға қарасты ауылдар­да 68 көше жөндеуден өтуде. Оның ішін­де 30 көше «Жұмыспен қамтудың 2020-2021 жылдарға арналған Жол карта­сы» бағ­дарламасы аясында, 16 көше «Ауыл  – ел бесігі» бағдарламасы бойынша, ал 22 көше қала бюджетінен бөлінген қаржыға жөнделеді. Көше­лердің бар­лығы сұранысқа ие, ба­ла­лар мен ауыл тұрғындарының қатынауына арналған күре жолдың қатарында. Сондықтан, бұл жұмыс елді мекен халқына қолайлы жағдай жасау амалы десек болады. Айта кететін жайт, жыл сайын ауылдардағы инфрақұрылым­ды қалыптастыруға және одан әрі дамыту­ға жүйелі түр­де қаржы қаралады. Биылдың өзінде бұл бағытта 1 млрд 800 млн теңге бөлін­­ді,  – деді Асқарбек Темірбекұлы.

Әкім орынбасары қала әкімдігінің ұғымында «шет аймақ» деген түсінік жоқ екенін және барлық аймақты тең дәрежеде жөндеуге назар аударылатынын айтты. Сондай-ақ, жүргізіліп жатқан жұмыстың сапалы орындалуы басты міндеттердің бірі екендігін жеткізді.

Шынымен, елді мекенде атқарылған жүйелі іс көптің көкейіндегі өзекті мәселе­лердің оң шешім табуына түрткі бол­ды. Тақтайдай тегіс жол, таза ауыз су, тұрақты жарық көзі елді мекен халқының қала тұрғындарымен тең дәрежедегі мүмкіндікке қол жеткізуіне жол ашуда.