Қараөзектегі құрмет
Кеңес Одағының батыры Нағи Ілиясовты ұлықтау шарасы Қызылөзек ауылдық оругінде жалғасты. Мұнда қайраткердің құрметіне ескерткіш белгі қойылды. Шараға қала әкімінің орынбасары Асқарбек Есжанов қатысты.Нағи Ілиясов соғыстан кейінгі жылдарын туған жерді түлетуге арнап, сол жолда еңбек еткен. Қайраткер Қараөзек кеңшарының директоры қызметін атқарған тұста ауылдың өсіп, өркендеуі үшін маңызды шешімдер қабылдап, дамуына ерекше еңбек сіңірген. Ол басқарған кезеңде Қараөзек кеңшарында әлеуметтік маңызы бар нысандар бой көтеріп, халықтың көптеп қоныстануына түрткі болған екен. Соның нәтижесінде Қараөзек республикадағы алдыңғы қатарлы ауыл дәрежесіне жеткен.
Жиын барысында қала әкімінің орынбасары А.Есжанов батырды дәріптеу парыз екенін, бүгінгі ұрпақ елінің ерлерін, олардың өнегелі өмір тарихын тануы тиістігін тілге тиек етті. Сондай-ақ ескерткіш тақтаның ашылуына келген батырдың ұлы Ринат Ілиясов та әке тәлімін, естеліктерін көппен бөлісті.
Шараға жиналған жұртшылыққа қайраткердің ерлігі мен өмірінен сыр шертетін «Батырдың үш өмірі – үш бақыты» атты кітап табысталды. Сондай-ақ оның рухына арнап құран бағышталды.
А.СЕЙІЛ
