Ақмешіт апталығы

Бұл білім ұясынан көптеген түлек бітіріп шығып, еліміздің түкпір-түкпірінде еңбек етуде. Олардың арасында Астана медициналық академиясының оқытушысы Гүлзира Жолмаханова, Алматы меди­цина институтының оқытушысы Жанат Үдербаева, Қорқыт ата атындағы Қызыл­орда университетінің оқы­ту­шысы Шолпан Иманғалиева бар. Сонымен бірге осы білім шаңырағынан түлеген Есқозы Исабеков педагогика ғылымының кандидаты, Қазыбек Ержанов химия ғылымының докторы, Алмас Әбсадықов филологияғылымының кан­ди­даты, Бота Сүлейменова педагогика ғылымының кандидаты атанды. Иә, ұстаз – ұлы да қадірменді тұлға. Үздік үрдісті үлгілі мектеп осындай мұғалімдері мен шәкірттерін мақтан етеді.

Педагогика саласындағы жаңаша оқу әдістемелері де оқушылардың шығар­ма­шылық қабілетін дамытуға жол ашты. 2003-2004 оқу жылдары мек­тепте оқушылардың ғылыми қоғамы құры­лып, содан бері тұрақты, жүйелі жұмыс жүргізуде. Мектеп оқушысы Ақбота Ешенова Гүлзира Назарәлиеваның жетек­шілігімен биологиядан облыстық эко­логия және балалар ғылыми жобалар конференциясына қатысып, «Қоршаған орта­ның адам денсаулығына әсері» тақырыбында ғылыми жұмыс қорғап, ІІІ орын иеленді. Мектеп мұғалімдерінің жетекшілігімен оқушылар «Дарын» республикалық ғылыми жоба байқауынан да жүлдемен оралды. Қалдыгүл Әбді­халықова есімді оқушының «Асқар Тоқ­мағанбетовтің шығармашылығы» тақы­рыбындағы ғылыми жобасы үздік танылып, «Алғыс хатпен» марапатталды. Тарих пәні мұғалімі Бақытгүл Жүбекешованың жетекшілігімен Жанар Үргенішбаева Ұлы Отан соғысының ардагері Тасмағанбет Батыршаев  туралы «Ер есімі – ел есінде» тақырыбында ғылыми шығарма жазып, мақтау қағазымен марапатталды. Сонымен қатар  Малика Махамбетова «Театр – руханият» тақырыбында өткен облыстық байқауда жүлдегер атанды. Тарих пәні мұғалімі Болар Оразбаеваның нұсқаулығымен Құралай Сартаеваның өлкетану бағыты бойынша жазылған шығармасы жоғары бағаланды.

Семей қаласында «Экология» тақырыбында өткен шығарма байқауында Диана Дәулетбаева ІІ орын иеленіп, дипломмен марапатталса, «Зерде» жас ғалым-зерттеушілердің республикалық сайысында Әділет Жарылқасынұлы «Су – тіршілік көзі» тақырыбында ғылыми жобасын сәтті қорғап ІІ дәрежелі диплом иегері атанды. Айдана  Махамбетова  «Абай оқулары» жарысының жүлдегері атанып, мемлекеттік білім грантына қол жеткізді. Зияткерлік байқау жеңімпазы Айдана Ілиясованың есімі республикалық  «Надежды Казахстана» кітабына енгізілді. Міне, осылайша мектеп оқушылары түрлі сайыстарда  топ жарып, ұстаздар үмітін ақтап келеді.

«Мектепте білім грантының көрсет­кіштері жоғары деңгейде» дейді мұндағы мұғалімдер. Жыл сайын бітіруші түлектер мемлекеттік грант иеленуде абырой биігі­нен түскен емес. №11 мектеп-лицей түлек­тері білім көкжиегіндегі мемлекеттік сынақтан сүрінбей өтіп келеді. Білім алушы түлектер де, білім беруші ұстаздар да қашан да марапатқа лайық. Мектеп тарихында «Алтын белгімен» бітірген түлектер саны жыл сайын артып келеді. Бұл – «Ұлт болашағы – білімді ұрпақ» екендігінің жемісті нәтижесі. 

Осы тұрғыда №11 мектептің ғылыми-әдістемелік оқу тәрбиелеу үрдісі мұға­лім­дердің жаңашыл педагогикалық зерт­теушілік іс-тәжірибелеріне арқау болып, жүйелі жұмыс жасалуда. Мектептегі ғылыми-әдістемелік жұмыстар мен пән бірлестіктері жалпыға міндетті білім беру стандарт талаптарының орындалуын қадағалайды. Барлық  пән бірлестіктері жүйелі түрде педагогикалық оқулар, шығармашылық әдістемелік сабақтар, ашық есік күндерін, семинар, шеберлік-дәрістер тағы басқа да түрлі іс-шара топтамасын өткізіп отырады. Бұл білім ошағында 2005 жылдан бастап «Жас ұрпақ» бірлестігі жұмыс істеуде. Бірлес­тік құрамында 600-ден астам оқушы бар.   Құрылған уақыттан бері көптеген сайыстарға қатысып, жеңімпаз атанып келеді. “Жас ұрпақ” бірлестігінің “Жас ұландар” байқауында “Ең үздік бірлестік”, “Ең үздік ту ұстаушы”, “Ең үздік газет” аталымы бойынша жеңіске жеткендерін атап өту қажет.   

– Мектеп заман талабына сай техни­калық құрал-жабдықтармен толыққанды жабдықталған. Жаңадан химия, биология, физика кабинеттері жасақталып жатыр. Сонымен қатар мұғалімдер мен оқушы­лардан құралған оркестр ашуды мақсат етіп отырмыз. Желтоқсан айында 25 домбыра, баян тағы да басқа музы­ка­лық аспаптар алдыртамыз деген жоспарымыз бар. Теннис үстелі де келеді деп күтілуде. Ең бастысы, оқушылардың сабақ үлгеріміне мән беру – біздің басты міндетіміз. Қазір карантин уақыты болған соң арнайы бастауыш сыныптар ғана мектепте білім алуда. Қалған сыныптар қашықтықтан оқуды жалғастыруда, – дейді мектеп-лицей директоры Ғани Сардарбеков.