МҰЗ ҒАЛАМШАРЫНЫҢ ҒАЖАЙЫПТАРЫ
Оқушылар сарайында «Мұз ғаламшарының ғажайыптары» тақырыбында қала әкімінің жаңа жылдық шыршасы өтті.Оған әлеуметтік жағынан аз қамтылған отбасы балалары, мүмкіндігі шектеулі, ата-анасының қамқорлығынсыз қалған бүлдіршіндер мен түрлі сайыстарда қала намысын қорғап жүрген өнерпаз өрендер қатысты. Жаңажылдық кеште балалар көрікті шырша жанында көңілді ән айтып, қызықты ойындар ойнады. Сондай-ақ, олар сан түрлі ертегі кейіпкерлерімен бірге би билеп, шат-шадыман күйге бөленді. Аяз ата мен Ақшақардың тілектерін тыңдап, тауық жылын шығарып салып, ит жылын қарсы алды.Шара барысында қала әкімі Нұрлыбек Нәлібаев жаңа жылдық жылы лебізін жеткізді.– Құрметті, жас достар! Сіздерді ертегілер әлеміне еліктірер, ғажайыптар мен сиқырға толы жаңа жыл мерекесімен құттықтаймын. Бұл – нағыз сіздерге арналған мереке. Біз бар жақсысын балаға арнаған халықтың ұрпағымыз. Балғын балалықтың базарында бақыт шапағатына бөлене беріңіздер, – деді шаһар басшысы. Бұдан кейін барлық бала қала әкімінің қолынан мерекелік сыйлықтар алып, естелік суреттерге түсті.
Бағлан ТІЛЕУБЕРГЕНОВА.
Суретті түсірген: Нұрболат НҰРЖАУБАЙ.
