ЖАСТАР ЖАТ ҚЫЛЫҚТАРДАН АУЛАҚ БОЛУҒА ШАҚЫРАДЫ
Кәмелетке толмағандар арасындағы қылмыстылық пен құқық бұзушылықтың алдын алу, олардың құқықтық сауаттылығын арттыру, жастар арасында саламатты және салауатты өмір салтын насихаттау, бос уақытын тиімді пайдалануға баулу мақсатында ағымдағы жылдың 16 ақпан күні «Жібек жолы» ойын-сауық кешенінде Жергілікті полиция қызметі Ювеналды полиция бөлімшесінің ұйымдастыруымен «Жастар жат қылықтардан аулақ болуға шақырады» ұранымен флешмоб өткізілді. Аталмыш шараға қала орталығындағы К.Қаракөзов атындағы №235 орта мектептің оқушылары қатысты. Іс-шараның мақсаты – жасөспірімдердің ата-анасының немесе заңды өкілінің еріп жүруінсіз беймезгіл уақытта жүруін тоқтату, өзге де заң бұзушылық әрекеттерге баруының алдын алу, қылмыстың объектісі немесе субъектісі болуының жолын кесу болып табылды.
Шараға қатысушылар өздерінің биімен есірткі, темекі сияқты жат қылықтарға қарсы екендіктерін, зорлық-зомбылықсыз өмірді қалайтындықтарын білдіріп, ұранды сөздер жазылған көрнекі құралдар арқылы барлығын салауатты өмір салтын ұстануға шақырды.
